I le faailoa ai e le Komesina o faigapalota, o le aso e amata ai ona faaulu ma lesitala sui faatutū o le palota, e mai le Aso Gafua 7 o Iulai e oo i le Aso Toonai 12 o Iulai, ma ua molimauina i lenei foi vaiaso le faaauau ona momoli atu sui tauva o patī faaupufai ma faalauiloa foi i upega tafa’ilagi sui faatutū mo nisi o patī faaupufai.
Photos: HRPP
I le patī faaupufai e puipuia aiā tatau a tagata ua mae’a ona momoli atu le sui tauva o le tofi faaolioli o le itumalo o Aana Alofi 3 o le susuga Niuapu Aiofaiva Faaui Leiataua Lesā, o se tamalii sa tauva foi i le palota tele o le 2021 i le fu’a lava a lea vaega faaupufai.
O le itumalo faapalota o Faasaleleaga 1 ua momoli atu foi i le vaega e puipuia aiā tatau a tagata le sui faatū le tofa Pipi Pauli Tevita Tariu Sinapati.
Ua momoli foi le sui tauva mo le tofi faaolioli o le itumalo o Sagaga 3 le afioga Tuala Oliveti Ah Him sa tauva foi i le palota tele o le 2021.
O le itumalo lea sa tula’i ai le afioga Salā Fata Pinati o le a lē toe tauva i le faigāpalota tele o loo loma nei.
O le isi sui faatū ua momoli i lea patī faaupufai o le tofa Namulauulu Papalii Sami Leota mo le tofi faaolioli o le itumalo palota o Faasaleleaga 3.
Sa tauva foi lea tamalii i le palota tele o le 2021 ma sa tula’i foi i le tofi o lea itumalo i le paeaiga 16 a le Palemene.
Photos: FAST Party
I le vaega faaupufai o le Faatuatua i le Atua Samoa ua Tasi ua momoli atu i lenei vaiaso le tofi faaolioli o le itumalo o Aleipata Itupa i Lalo o le afioga Vaotogo Rodney Chang Tamasese, faapea foi le sui faatū mo le tofi faaolioli o le itumalo faapalota o Vaisigano 2 o le afioga Tagaloa Leilua Tupou Afa.
Ua faapena foi ona faailoa e lea patī faaupufai le momoli atu o le tofi faaolioli o Vaisigano 1 o le afioga Amituanai Malolo Tautofi Roma.
Photos: Samoa Uniting Party
O le patī faaupufai o le Samoa Ua Potopoto i lana upega tafa’ilagi ua faailoa ai nisi o ana sui faatutū, e pei o le afioga Sooalo Maua’i Kuresa Sooalo o le a tauva i le tofi faaolioli o le itumalo o Gagaifomauga 2, o lea tamalii sa avea ma Ofisa Sili o le pulega o uafu ma taulaga.
O le isi sui tauva o lea patī faaupufai o le afioga Tofele Seufale Fataalii Milovale Moke o le a tauva mo le nofoa o le itumalo faapalota o Vaimauga 1.
O le afioga Mapu Capt Tafaigata Toilolo o se tamalii tele tausaga o galue i le pulega o uafu ma taulaga faapea le faalapotopotioga o vaa a Samoa.
O le a tauva o ia i le nofoa o le tofi faaolioli o le itumalo faapalota o Faleata 4 lea sa tula’i mai ai le tofa i le igoa matua le fetalaiga Ale Vena Ale.
O isi sui faatutū e to’asefululima o le malo tausi o loo faailoa foi i le upega tafa’ilagi a le Samoa Uniting Party le Samoa Ua Potopoto.
I sui tauva tuto’atasi o le itumalo o Gagaifomauga 2 o le a tauva ai se tasi o tamalii sa finau foi i le palota laitiiti a lea itumalo ina ua tuumalo le afioga Vaele Iona sa tula’i i le tofi faipule i le amataga o le paeaiga ua faata’ape nei a le Palemene, o le afioga Falesaopule Lalomanu Seimaleula Tanea Vaialia Iosua.
