A o tālia ai nei se aso o le a usuia ai le ulua’i tauaofiaga a le paea’iga 18 o le Palemene o Samoa, e faatauto ai sui usufono filifilia o itumalo e 51, faapea foi ona faailoa ai le Palemia filifilia ma lana Kapeneta aemaise o tofiga Fofoga Fetalai ma le Sui Fofoga Fetalai.

Ua lipotia ai nei le momoli mai o faamanuiaga ma le faamālō a ta’ita’i o Malo o Niu Sila ma Ausetalia i le ta’ita’i ma le vaega faaupufai o le Faatuatua i le Atua Samoa ua Tasi ona o le manumālō ai i le faigāpalota a le atone i le faai’uga o le vaiaso ua mavae.

Ua aumai ai foi ma le faamālō a ta’ita’i o ia malo le Palemia o Ausetalia o Anthony Albanese ma le Palemia o Niu Sila ia Christopher Luxon i le susuga Laaulialemalietoa Leuatea Polataivao Fosi Schmidt, i lona avea ai ma Palemia filifilia o le malo o Samoa.

O moomooga o ia ta’ita’i o le a galulue faatasi ma le faigāmalo fou filifilia mo le faatumauina pea o sootaga lelei faavaomalo ma Samoa.