O le tumutumu ai pea o nofoaga o loo faia ai lesitala o tagata palota mai le 9 i le taeao e oo i le 8 i le po, ua faailoa e le Komesina o faigāpalota, le tuuina atu ai i leoleo mo su’esu’ega ni gaioiga solitulafono ua tula’i mai i le faatinoga o lesitala.
Ua tuua’ia ai nisi o sui tauva ma sui o komiti a i latou o loo faamoemoe e tauva i le faigāpalota, i le faia o ni gaioiga e lē o faatagaina i le tulafono o faigāpalota.
O se tasi o ia gaioiga o le la’u atu i taavale a sui o komiti ma sui tauva o tagata palota e fai lesitala.
O se tasi o gaioiga ua faaaogā le imeli a se tagata e to’atasi e lesitala atu ai ni tagata palota se to’atele i luga o fesoota’iga faaonaponei le online registration.
O loo tuua’ia ai foi nisi o sui faatutū ma sui o komiti i le faia o lea tulaga.
Mo le silafia i taimi a o faaaogā pepa ID e palota ai, o le tasi lea o gaioiga na mafua ai ona suia tulafono ma tapu le toe la’u atu e sui o komiti ma sui faatutū o tagata e lesitala, auā ua fesoasoani i le faatinoina o isi faiga solitulafono aemaise o faiga faaalatua e togafalea ai faigā filifiliga sa’oloto a tagata e tatau ona tausisia le faimea tonu e lē pisipisia i ni faiga eleelea.
