O faailoilo ma faamatalaga tuuina mai mo fautuaga ma lapata’iga i se galulolo i le aso ananafi na molimauina ai le faanatinati o le to’atele o tagatānuu o atumotu eseese o le Pasefika e tapenapena ma aga’i i nofoaga maualuluga ma atumauga.
O Hawaii le atunuu o le Pasefika na maualuga tulaga na nofo vaavaaia ai ona o le faamalosia o lapata’iga o le oo atu o se galulolo poo se tsunami.
Ae na maitauina le malolosi o galu fafati i gataifale o Amerika Samoa, ma na vaaia i luga o upega tafa’ilagi le faanatinati atu o fanau a’oga i totonu o le malo o Tonga, e aga’i ese mai o latou falea’oga ae aga’i i nofoaga maualuluga.
O Samoa sa vaaia le to’atele o nisi o aiga e tulalata i le sami ua aga’i ese mai o latou fale ae aga’i i laufanua saogalemu.
O Niu Sila nei sa tuuina mai foi fautuaga i le fetaia’i ai o gataifale o le atunuu ma galu tetele, ma mata’itūina ai le galulolo.
E pei ona faalogoina ai le tele o faailoilo na aumai e ala i fe’au tusitusia i telefoni.
O nei lapata’iga ma fautuaga na tuuina mai i le aoauli o le Aso Lulu, 30 o Iulai, mai le pulega o le vaaitau, ina ua māua faamatalaga ma faamaumauga i se mafui’e tele na lūlū i tai ane o gataifale o Lusia.
Faamauina i lipoti e 8.8 le malosi o le mafui’e ma e ta’ua i lipoti mai le CNN na molimauina le aafia i galu fafati o Marquesas Islands e faapea e 10,000 kilomita le mamao mai le itu tonu na amata ai le mafui’e.
Faamauina le salalau ai solo i luga o upega tafa’ilagi ata pu’e poo videos o loo faaalia ai le lūlūina o lea mafui’e tele i Lusia, ma lagonaina foi e atunuu e pei o Iapani.
Lipotia le iai o fale i Lusia na faaleagaina ona o lea faalevelave faalenatura.
Puna o Faamatalaga: https://www.rnz.co.nz/international/pacific-news/568515/tsunami-advisories-lifted-across-pacific-following-magnitude-8-point-8-quake-off-russia-s-coast
