E faitau afe tagata na molimauina le alu o so latou solo i Lonetona e faaali lo latou valevale alofa i se tasi o tagata Amerika, o sē ua iloga i ana tautalaga ma faatasiga ina ua tagatavaleina o ia i le vaiaso ua tuana’i, le alii o Charlie Kirk. 

Ma o se tasi o vaaiga māta’ina i lenei solo na maitauina ai le aga’i ane ai o faalapotopotoga o tagata Kerisiano Maori i Lonetona e faaleo lo latou valevale alofa, ma sa’afi’afiga e ala i so latou haka.

Na molimauina le lolofi ane o le to’atele o tagata na savavali i le solo e matamata i lea foi tū ma aga a tagata Maori, aemaise o aga i fanua a Aotearoa, e faaalia ai lo latou alolofa tele mo le alii o Charlie.

I talaaga i le matāupu, i le alii o Charlie, sa iai lea alii mo se tasi o ana tautalaga i le Iunivesite i Utah, ua faaigoaina o le Utah Valley University, ae tagatavaleina loa e se tasi.

O le mea mata’utia i lea gaioiga o le faatino ai e lenei tagata o nei gaioiga faalēalofa a o tumutumu ai fanau a’oga o le Iunivesite o loo aga’i atu e faalogologo ma faatino fesili ia Charlie. 

Ae o le tasi o vaega faamomoiloto o le aafia ai o lenei alii o loo iai uma ma si ona aiga lona to’alua ma si ana fanauiti. 

Na maliu Charlie, ona o le tugā tele o ona manu’aga na lavea ai. 

Ua faamaonia le maua ma o loo taofia nei i le falepuipui le alii 22 tausaga, o Tyler Robinson, o loo masalomia nei i le maliu ai o Charlie Kirk. 

E tusa ai ma lipoti ma faamatalaga, e lē gata ina faatino ai solo i Lonetone, ae na maitauina foi le tele o solo sa faatino i le tele o isi atunuu o le lalolagi, e faaali lo latou agaga tutū faatasi e tetee atu i nei amioga ma gaioiga lē migao, ua ma’umau ai le soifua o se tagata.

Ae o se solo ua faaalia ai le omai faatasi o tagata Kerisiano e ta’utino atu lo latou lē solomuli ai lava mai le tala’iina o le talalelei ia Iesu Keriso.

E maliu Charlie Kirk ua 31 tausaga o lona soifua.

Puna o Faamatalaga: https://www.youtube.com/watch?v=7Kt85EuM1js