O le alii foma’i le tofa Leausa Dr Take Naseri o se tasi na tula’i e molimau mo le itu a le tama’ita’i o Papalii Sia Figiel lea o loo molia i le maliu o le tama’ita’i polofesa o Dr Caroline Sinavaiana Gabbard.
Na faailoa ai e le foma’i o ia o se tasi o foma’i o loo faagaioia lana auaunaga tuma’oti sa siakiina ma vaai Papalii Sia i le falepuipui i Tanumalala o loo nofo taofia ai.
O lana molimau na faailoa ai o lē ua molia e iai ona gasegase tumau o le suka ma le toto maualuga, ae sa ia faamatala ai foi ina ua fesiligia e le loia o loo finauina le tali tetee a Papali Sia i moliaga a leoleo, o ia e lē o se foma’i o le mafaufau.
Ae sa tulituliloa le molimau a le alii foma’i i sona silafia i ni aafiaga o se tagata e anapogi pe taofi le tausami i se mea’ai ma le vai mo ni itula o le aso ae na tali le molimau o le faapa’ūina o pauna o le mamafa o le tino le tasi o mafua’aga, ae o le isi o mafua’aga o le faaoge e lē tausami poo le hunger strike o se gaioiga e faailoa ai ni lagona tetee ma le lē fiafia.
O le tasi o molimau mo le itu a lē o loo molia o se tasi e latalata i le aiga o Papalii Sia ona o se masaniga ma le tuaa tinā o lē o loo molia.
Na faailoa foi e lea molimau gasegase tumau na faailoa e le foma’i ma sa ta’ua ai foi se gasegase o le mafaufau e aafia ai Papalii Sia e ta’ua o le bipolar.
Sa faailoa e le molimau o se aafiaga na iloa ina ua vaai e se foma’i i Amerika lē ua molia i ni tausaga ua tuana’i.
O se tama’ita’i foma’i o le mafaufau na muamua tula’i e molimau mo lē ua molia lea na ia faailoa ai foi le bipolar le aafiaga o le mafaufau e maua ai Papalii Sia Figiel, ma o se aafiaga e māfua i le tele o mea eseese ua luluti ai le mafaufau lea e ta’ua o le depression.
E tolu molimau mo lē ua molia, ae ua tolopo nei le tuuina atu o finauga mulimuli a loia a leoleo ma le loia a lē ua molia i le aso 25 o le masina nei o Setema.
O loo teena e Papalii Sia Figiel moliaga a leoleo o le fasioti tagata faamoemoeina, fasioti tagata pa’ivalea, faaoolima tugā, ma le umia o ni ‘au’upega mata’utia.
