Ua molia nei i le tulafono se talavou e 20 tausaga le matua, i le fasioti tagata faamoemoeina, i se faalavelave na alia’e mai i Hamilton na masalomia ai le faaaogāina o se laaumalosi.
Na lipotia mai i le mae’a ai ona faatino e lea talavou o le soligatulafono na ia faasiilima ai se tasi o tagata ma ave faamalosi lana taavale, e sola ese ai ma leoleo.
E tusa ma faamatalaga mai le NZ Herald, na logoina atu leoleo i se matāupu i se tasi o fale i lona tuātusi o le Bellmont Ave, Chartwell, pe tusa lea ma le toe 20 minute i le itula e 7 i le afiafi o le Aso Lulu.
Na maua atu ai se alii e 31 tausaga le matua, ua maliu.
Ta’ua e leoleo e oo atu sui o le latou ofisa e tali atu i le valaau, ua leai lē na maliu ai lea taule’ale’a e 31 tausaga le matua.
Ma i le maua atu ai o le tino maliu o lē na aafia, na aga’i ai loa sa’ili’iliga a malu o le malo e tau sa’ili le talavou, ma na māua le faaaogā ai o le vaalele a leoleo le helikopa o le Eagle e sa’ilia ai lea alii i itu uma o Waikato.
Faamauina e Detective Inspector Daryl Smith, na faasiilima e le talavou se tagata na malaga atu i lana taavale, ma na ta’ua na tu iai le taavale a lē na aafia ona o lea sa faailo iai e moomia se lifi i le auala o Gordonton Rd ma le lilo i manatu o le faasiilima o ia ma ave faamalosi lana taavale.
Na tuliloaina lava e leoleo ma maua atu o ia i le tasi o aai, ua ta’ua o Ngāruawāhia ina ua maua e nisi o vaega a le matāgaluega le taunuu atu ai o le taavale i lea faaitu poo le toe 20 minute i le itula e 1 i le vaveao.
Na saisai ma taofia ai lava e leoleo lea alii.
Ua molia ai nei e leolelo o ia i le fasioti tagata ma le loto iai poo le murder, o le faomea matuiā (aggravated robbery) ma le moliaga o le lē usita’ia o faatonuga ma faasinoala o leoleo i le tiute i le auala i lona faaperetaniaina, failing to stop for police.
O le asō o loo faamauina e tula’i ai lea alii i luma o le Faamasinoga Faaitumalo o Hamilton.
Puna o Faamatalaga: https://www.nzherald.co.nz/nz/crime/man-charged-with-murder-after-fleeing-hamilton-crime-scene-stealing-car-at-gunpoint/
