O moliaga o le faaoolima ma le faaoo manu’a ua molia ai ni alii se toafā lea na latou faia ni faaoogalima i ni taulelea se toalua i Pesega i le faaiuga o le vaiaso na tea nei.

Faamaonia mai e le sui komesina o Papalii Monalisa Tia’i Keti o le Aso Lua na molia ma taofia ai i latou i lalo o le vaavaaiga a leoleo.

Ta’ua e Papalii o lea mataupu na mafua i alii e toalua na aafia, ina ua o la lafo ni upu masoā ia i latou ua molia a o agai mai i le taavale.

I lipoti e faapea na faasuāavā i laua na aafia, ma o i na lē fiafia ai i latou ua molia ma o latou faaoolima ai loa ia i laua.

I se ata na pue e nisi o le mamalu o le atunuu o loo manino lelei ai le ta kiki ma tatu’i e i latou o i laua na aafia.

Na vaaia le taatitia o ia alii i luga o le auala, ma na fesootai e nisi o le atunuu le 911 mo se fesoasoani lea na tali atu ai le Pulega o le Tineimu ma auina atu ai ia alii i le Maota Gasegase i Motootua ma togafitia ai.

O le maitau a le Matagaluega o Leoleo o le tele o faalavelave o loo tulai mai ona o aafiaga o le ava malosi.

O le fautuaga a le tamaitai sui komesina i le atunuu o loo taumafaina le ava malosi ina ia taumafa ma se fuafua ma faamuamua lava le saogalemu.

O le aso 9 o Aperila o le a valaau ai i latou i luma o le Faamasinoga Maualuga.