Ua faamaonia mai e le Komesina o le Matāgaluega o Leoleo, Falepuipui ma le Toe Fuata’ina le tofa Auapaau Logoitino Filipo, le faia e leoleo o se moliaga e tasi o le taufaaleaga le defamation, faasaga i se tusitala sinia le tamaitai o Lagi Keresoma o loo galue i le vaega faasalalau o le Talamua.

Faaalia e le Komesina i tusitala o se tagi ua faaulu atu e mafua i se tala na tusia e lē ua molia ma faasalalau, o le mafua’aga lea o le moliaga ua faia i aiaiga o le tulafono o soligatulafono le criminal libel.

O lea lipoti sa ta’ua ai se taumafaiga a nisi o aiga o se alii sa avea ma malu o le malo, e tāpā se fesoasoani mai le Ao o le Malo e ave ai i tua le tagi na faaulu faasaga i lē sa avea ma leoleo. 

O lē ua molia o le Pelesetene o le JAWS le faalapotopotoga o tusitala ma le aufaasalalau a Samoa.

O le Aso Lua, 24 o le masina fou o Iuni o le a valaau ai i le tolaulauga muamua lenei matāupu i le Faamasinoga Faaitumalo.