Ua faamaonia mai nei le molia ai o ni tupulaga talavoue aofia ai ma se tamaitiiti 11 tausaga le matua, talu ai ni matāupu o loo aafia ai le faaitu lea o Dunedin. 

Lipotia mai na gaoia e i latou nei e to’afā se taavale i lona ituaiga o le Mazda Demio mai le nofoaga ua ta’ua o le Opoho i Mātū o Dunedin. 

Ta’ua e le Satini Sinia o loo nafa ma lea matāupu ia Anthony Bond, na māua faamatalaga i lea lava taavale o loo faaaogā i se tuuga taavale i luma a’e o se fale pamu penisini i Anderson Bay Road pe toe 20 minute i le itula e10 i le taeao nei.

Na faapena ona maua atu e leoleo o loo faatino a latou petolō i le Victoria St.

Faamauina o se tama’ita’i 15 tausaga le matua na aveina le taavale ma ni tama’ita’i talavou se to’alua ta’i 16 tausaga le matutua ma se tamaitiiti e 11 tausaga le matua. 

E ta’ua na gaoia foi e i latou nei se isi foi taavale, i lona ituaiga o le Mazda Familia ma faatino ai foi tuuga taavale i le aoauli o le Aso Tofi poo le toe 10 minute i le itula e 3 i le aoauli. 

Na faamauina ua molia uma nei i latou nei i le tulafono.

O le tama’ita’i 15 tausaga na aveina le taavale ua molia i moliaga e lua o le ave faasolitulafono ai o se taavale ma le 2 moliaga o le gaoi.

Ta’ua foi le maualuga o le fua na oo iai le faasoa’ava a le talavou ina ua faatino gaioiga a leoleo o le faafeula ai o le paluni poo le breathalyser. 

O le Aso Gafua, o loo fuafua e tula’i ai i luma o le faamasinoga mo tupulaga talavou – youth court a Dunedin, ae ua tuuina atu nei le isi to’atolu i le Youth Aid.

Puna o Faamatalaga: https://www.stuff.co.nz/nz-news/360746209/child-11-arrested-other-teens-after-late-night-joyride