E 15 tausaga o se tamaitai talavou ua molia ma taofia nei e leoleo ina ua faamaonia lona taumafai e faalavelave i taumafaiga ma su’esu’ega a leoleo i le maliu ai o se isi tamaitai e 15 tausaga e igoa ia Kaea Karauria.
I se faasalalauga faalaua’itele i luga o upega tafa’ilagi a le pou poo le ofisa faaitumalo i Sasa’e a leoleo, o le Eastern District Police na faamanino mai ai, o le tamaitai ua molia na faafesoota’i atu i molimau o le matāupu, ma taumafai e faatino gaioiga o le taufaamata’u i le molimau.
Ta’ua e le Ta’ita’i Leoleo Asiasi o se leoleo leoleo su’esu’e faapitoa foi, Detective Inspector Dave de Lange, mai o latou faamuamauga ma su’esu’ega, na māua ai le faia e lē ua molia o ia gaioiga i le aso 12 o Me o le aso na sosoo nai mai le aso na tula’i ai le feeseesea’iga lea na maliu ai Kaea.
Faamanino foi e le ta’ita’i leoleo, na o latou maua faamatalaga o ia gaioiga i le aso 6 o Iuni a o toe faasolo ai a latou iloiloga ma le toe fesiligia o tagata e tusa ai ma le matāupu, ae faailoa ane loa e se tasi le mea ua tupu.
Ua molia ai lea talavou i le taupulepulega leaga e faaliliu ese le faamasinoga amiotonu ma le loto iai i lona faaperetaniaina, “wilfully attempting to pervert the course of justice”, ma o le a tula’i i luma o le faamasinoga mo tupulaga talavou, le Hastings Youth Court i le masina fou.
Faailoa e le ta’ita’i leoleo ia Dave de Lange, e matuiā tele le faalavelave o se tasi i su’esu’ega leoleo ma e lē māmā i o latou manatu lea tulaga, ma e ‘alo foi malu o le malo e faatino le latou pitolaau pe a maua se tasi o faia lea tulaga.
I le tulaga o le matāupu i le maliu ai o le talavou ia Kaea, o loo talosagaina e leoleo soo se tasi na te silafia ni faamatalaga e tusa ai ma lea faalavelave ina ia faafesoota’i atu le ofisa.
Puna o Faamatalaga: https://www.facebook.com/photo?fbid=1034984095451422&set=a.251189480497558
