E 27 tausaga tausaga o se alii e faigaluega i se faletalimalo i Lefaga ua molia nei e leoleo i le masalomia o le taumafai e faaoo manu’a ma le ulufale faamalosi e aunoa ma se faatagana i le potu o se tasi o sui o le aumalaga a le Australia Survivor TV Show.
I ripoti a le Samoa Observer na taua ai o le alii ua taofia nei ma molia e mai le afioaga o Leulumoega ma na taua e le Komesina o leoleo Auapaau Logoitino Filipo o le tagi na faaulu atu e le sui o le au pueata mai Ausetalia i le 2 vaiaso talu ai ma o loo i lalo pea le vaaiga a leoleo.
Taua e Auapaau o loo masalomia sa ulufale faamalosi lea alii i le potu o le sui o le au pu’eata mai Ausetalia a’o loo moe ma o loo maslaomia ai foi lona faaoolima ai i lea sui mai Ausetalia.
Lipotia foi o loo iai nisi o meafaigaluega a lea aumalaga o loo tausailia foi e aofia ai masini laptops, o meapueata ma telefoni.
O le ua molia o le a tulai i luma o le faamasinoga faaitumalo i le Aso 27 o le masina nei.
