Ua molia e le Worksafe le kamupani tele a le Fulton Hogan mo le mataupu na maliu ai se tagata faigaluega auala ia Fepuari o le tausaga talu ai.

Ua ta’ua i le lipoti o si tagata faigaluega e suafa ia Brian Barnes na lavea i se loli i se nofoaga i luga o le State Highway 23 e lata i Hamilton sa faigaluega ai.

O le masina talu ai na lau ai le i’uga o le aveloli o Michael Stacy mo le avetaavale faatamala ua mafua ai le maliu ae ua molia nei e le Worksafe le kamupani a Fulton Hogan i lalo o vaega e tolu o le tulafono mo le saogalemu ma le soifua maloloina, health and safety, feta’ua’ina ai o lo latou faatamala na tuu ai le tagata faigaluega i se tulaga lamatia e ono maliu pe manu’a tigaina ai le tagata faigaluega mai taavale.

Ua ta’ua i le lipoti o le loli na aafia ai Brian sa faigaluega i se poloketi a le Waka Kotahi i le taimi na tupu ai le faalavelave ma e lē o fia faia se faamatalaga a le kamupani a Fulton Hogan i le mataupu lea ae fai mai le NZTA Waka Kotahi e lei iai sa latou suesuega ua faia i le mataupu ae o leoleo ma le Worksafe o loo ta’ita’ia le suesuega o loo faatino nei.

Puna o Faamatalaga: https://www.1news.co.nz/2024/06/06/fulton-hogan-charged-over-death-of-roadworker-killed-while-moving-cones