O le lavevea o ni loli mamafa la’u uta i ni faalavelave se lua e eseese taimi na tutupu ai i se vaega o le alatele mai Tiavi aga’i i Siumu, ua lapata’ia ai avetaavale e uia lea alatele e le pulega o feoa’iga i luga o le laueleele le Samoa Land Transport Authority.
O le Aso Lulu o le vaiaso nei na tutupu ai faalavelave ia e lua, ma o le tasi o loli mamafa na oso i tua ma le auala ma faatafa ai ae salalautasi lana uta o maamaa i se vaega o le alatele, ae o le isi loli mamafa na oso foi i tua ma lana uta ma faaleagaina ai i se tulaga ogaoga le loli.
O le avetaavale e pei ona faailoa i se lipoti na maliu ai.
O le fautuaga lea a le pulega o feoa’iga i le laueleele ia faaeteete le soona saoasaoa o taavale e uia lea alatele, aemaise lava le vaega o lea auala ua mae’a ona valitā.
I le Aso Tofi o le vaiaso foi lenei na molali ai le ‘afa atoa o se taavale i le vaega i luma (silasila i le ata) ina ua palasi iai se pusaoloa mamafa poo se container a o tu pe paka lea taavale i se vaega o le uafu i Matautu i Apia.
O loo su’esu’eina e leoleo le māfu’aga ae leai se soifua na aafia ai, ae ua matuā faaleagaina le taavale.
