Ua faailoa i se tulaga faalaua’itele i auala o fesoota’iga televavave faaonaponei se fe’au faamafanafana ua faamaise ai le ofisa o le malo o Amerika i Samoa, i aiga uma ma uo a le susuga Afa Folasa Ah Loo na maliu faafuase’i ina ua aafia i se pulufana mai se laaumalosi i le taimi o solo tetee o le No Kings i le Setete o Utah i Amerika i le Aso Toonai na te’a nei taimi i Amerika.
O Afa o se tamafanau a Samoa e faamautū i lea setete ae o se tasi ua lauiloa i le lalolagi i lona tomai o le su’iina o laei poo ofu.
Faaalia i le fe’au faamaise mai le ofisa o Amerika i Apia, o se tasi o valaaulia a le malo o le Iunaite Setete e ala mai i le ofisa o lea malo i Niu Sila na avanoa ai ona auai Afa i se faaaliga tele o laei, le Pacific Fusion Fashion show sa faia i le aai o Aukilani i le lua tausaga ua mavae.
E pei ona silafia o se tasi o laei sa saunia e Afa Folasa Ah Loo sa faaaogāina e le Tausala o Samoa ma le Tausala o le Pasefika ua mae’a lana nofoaiga le tamaitai o Moemoana Safaatoa Schwenke.
Sa auai foi o ia i se faaaliga o laei i Europa lea sa faia i le aai o Lonetona i Peletania i se tausaga e le’i mamao atu.
O lipoti i le amataga o lenei vaiaso ua faailoa ai o loo faaauau su’esu’ega a leoleo i le Setete o Utah i le maliu o lea alo ma tamafanau a Samoa.
