Ua faamaonia mai nei e le pule o maliu poo le coroner le mafua’aga na maliu ai o se tinā, 43 tausaga le matua mai Ueligitone.
O lenei tinā e suafa ia Amber-Leigh Hunwick, ma e tusa ai ma ripoti, o lenei matāupu na aafia ai lea tinā, e faapea sa tula’i mai a o iai i lalo i vaavaaiga a leoleo a o taofia ai o ia i le ofisa o leoleo i le masina o Ianuari o le tausaga ua mavae.
Ae i sa’ili’iliga a le foma’i poo le pule o maliu, na faaalia ai, o ni aafiaga faalesoifua mālōlōina, e pei o le gasegase o le fatu (cardiovascular disease) o aafiaga i le māmā poo le lung damage, e faamauina e afua mai i le faama’i o le Koviti-19, ma se tasi o aafiaga tele o lona mana’o tele i fualaau poo le vaega ua ta’ua i le gagana Peretania, chronic drug use.
I faamatalaga i ripoti mai le leitio faavaomalo a Niu Sila, sa feagai Amber ma se taotoga i se taimi e le’i mamao atu mai le taimi na taofia ai e leoleo, ae sa maitauina le faalogoina e lea tinā o le tigā i lona fatafata; e faapea sa fai atu Amber i leoleo i le mea ua tupu, ae na ona tuu atu iai o ni fualaau mea tigā le panadol, ae mulimuli ane, ua maua atu ua taatia mai i totonu o le sela ua lē iloa se mea.
E ui i le faitioina o le faatamala ma le lē lelei ona faatino ai e leoleo o le latou pitolaau i le vaaia lelei ai o lenei tinā a o iai i lalo o le latou vaavaaiga, ae ua faamanino e le pule o maliu ia Rachael Schmidt-McCleave, e tusa lava pe na mulimulita’ia e leoleo gaioiga uma, e leai se mea e mafai e taumafai e lavea’i mai ai Amber.
I le tula’i mai ai o lenei matāupu, o lea ua faamauina le amata faatino ai o iloiloga ma galuega e saga faalaua’itele ai galuega faatino mo le vaaia lelei o taofia.
Ae o loo maitauina le tutū malosi o le aiga o lē ua maliu sa tatau lava i leoleo ona vave iloa ua i se tulaga faaletonu lo latou tagata ina ua ia fai atu ua lē atoatoa lona malosi, ma sa tatau ia i latou ona tuuina atu o ia mo ni togafitiga.
Puna o Faamatalaga: http://www.police.govt.nz/…/ten…/warm-southern-welcome
