Ua faailoa lautele nei ata ma suafa o sui tauva tuto’atasi e 21 ua i totonu o le mafutaga e to’a 27 a sui tuto’atasi ua galulue faatasi.
O le isi to’aono e lē o finagalo e faailoa i latou ae o le faailoa lautele ai o le 21 o ia sui tauva tuto’atasi, ua faailoa ai e le ta’ita’ifono o lea mafutaga, le sui tauva tuto’atasi mo le itumalo o Aiga i le Tai le susuga Leiataualesa Jerry Brunt, lona teena o le finagalo o le ta’ita’i o le patī faaupufai e puipuia aiā tatau a tagata, sa ta’ua ai se faipisinisi o loo galulue ma le mafutaga a sui tauva tuto’atasi.
Ua teena ai foi e le ta’ita’ifono ma se tuua’iga a le susuga Tuilaepa L Sailele Malielegaoi e faapea o loo nonō atu e lea faipisinisi i sui tauva tuto’atasi o loo galulue faatasi, ni tupe e tapena ai i le faigāpalota.
Ua faailoa e le susuga Leiataualesa Jerry Brunt i le nusipepa o le Samoa Observer o le matāupu sili ona tāua e ao ona ave iai le faamuamua o faiga faaālatua poo le corruption o se tau faamata’u ogaoga ma tugā i le faatemokalasi a Samoa.
O faiga faaālatua ma faiga piopio ua faailoa e Leiataualesa ua aveesea ai le mamalu ma le amiotonu o pulega malo a Samoa.
Ua faailoa nei e le mafutaga a sui tauva tuto’atasi ua galulue faatasi, o le latou sui ta’ita’ifono o le afioga Fuimaono Atanoa Aloalii o le sui tauva mo Falealili2.
O sui tuto’atasi ua faailoa o latou ata ma suafa o Safai Iosua Selesele mo Vaimauga 1, sui tauva tama’ita’i le afioga Niuafolau Fauolegogo Patu Tanielu mo Vaimauga 2, Siligatusa Alosina Ropati mo Vaimauga 3, Vaea Ivana Eli mo Vaimauga 4, Salā Vaimili II mo Sagaga 3, Taueva Sauvao Faafouina Mupō mo Aana Alofi 1, Aiono Tuala Meapelo Frost mo Aana Alofi 2, Tagoiaega Maotua Levi Puipui mo Aana Alofi 4, Levaa Samoa James Utuva mo Aiga i le Tai, Masinalupe Tusipa Masinalupe mo Lefaga ma Faleaseela, Asuao Faalogo Kapeliele Faalogo mo Siumu, Si’a Alec Leaupepe Latū mo Falealili 1, Alailesulu Faapalo Toomalatai mo Aleipata Itupa i Luga, Valu Mata’ia Nafoitoa Talaimanu Keti mo Gagaemauga 2, Lavea Tupa’imatuna Iulai Fiso Lavea Loia mo Gagaifomauga 1, Falesaopule Seimaleula Vaialia Iosua mo Gagaifomauga 2, Motuopuaa Henry Afereti Papalii mo Vaisigano 2, Tupai Avala Fa Savaiinaea mo Palauli1, ma Tiatia Faleupolu Tevita mo Palauli 2.
