Ua mae’a galuega sa toe iloilo ai le lola palota autū mo le faigā filifiliga a le atunuu i le aso 29 o le masina nei, ma ua faailoa ai e le Komesina o faigāpalota e 102,236 tagata ua lesitala nei i le lola palota autū auā le faigāpalota o loo loma nei.

O lea aofa’iga ua aveesea ai tagata maliliu ma le ‘autalavou sa faamoemoe e aulia lo latou 21 tausaga e lesitala ai o ni tagata palota i le masina o Oketopa o le tausaga nei.

O i latou ia sa fuafua e lesitala a o faatulaga ai le faigāpalota tele mo Aperila o le tausaga fou, ae ua faafuase’i ona faia le faigā filifiliga a le atunuu i le masina nei o Aokuso.

E 1,430 ua aveesea talu lea tulaga ua aofia ai ma nisi ua maliliu e pei ona nisi tagata sa lesitala ia Aperila o le tausaga na te’a nei ae ua maliliu e le’i faia le palota tele.

O faamaumauga muamua i le mae’a o le tusigaigoa mulimuli a le atunuu e 117,225 tagata e tatau ona lesitala e palota, ae ua aveesea ai le 1,430 e aofia ai le ‘au 21 tausaga ma nisi ua maliliu.

O le mautū ai o le lola palota autū mo le faigāpalota o lumana’i nei ua manino mai ai e 81 pasene o tagata palota e agavaa o le a faia le filifiliga aoao a Samoa mo nisi ta’ita’i e tauaveina tofi Faipule o le Palemene mo le isi lima tausaga.

Faaalia e le Komesina o faigāpalota e lelei le pasene ua ausia ae sa taula’i le galuega a lona ofisa ia maua se 90 pasene o tagata palota.

Le afioga Toleafoa Tuiafelolo Alexander John Stanley o le komesina o faigāpalota.