O le Aso Faraile ua mavae na faailoa ai le finagalo o le Faamasinoga Maualuga i le talosaga a le Komesina o faigāpalota e ala atu i le Loia Sili mo aso e faatulaga ai le tuuina atu o ni talosaga e fesiligia ai le tulaga agavaa o sui tauva ma tagata palota, aemaise o ni talosaga e fesiligia ai le agavaa o ni sui faatutū.
O le Aso Faraile 15 o Aokuso e tatau ona fofogaina ai faai’uga uma a le Faamasinoga Faaitumalo e faasino i ni matāupu e fesiligia ai le agavaa o ni tagata palota, ae a lē mae’a ona tagofia ni matāupu tau i lea tulaga, o le a faaauau pe a mae’a le palota aoao a le atunuu.
O le aso foi lea e tatau ona aumai ai faai’uga a le faamasinoga o faigāpalota i ni matāupu e faasino i ni lu’i e fesiligia ai le agavaa o se sui tauva.
