Ua lē faamanuiaina le isi o taumafaiga e ala i se finauga i le Faamasinoga o Talosaga a le Faamasinoga Maualuga, sa toe lu’i ai le faai’uga a le Faamasinoga Sili sa faamautū ai o le motu o Namu’a i le Atu Aleipata, o loo lesitala o se aseta a le malo o Samoa.
Sa toe finauina e Tu’isila Malufiti Fagaso’aia Malufiti i le Faamasinoga o Talosaga Apili le mau o le motu o Namu’a o le meatotino a lona aiga.
Peita’i o lea e ui sa faamauina faaletulafono le avea o le motu ma meatotino a le aiga i le tausaga e 1873, ae na aveesea ma faamutaina i se faai’uga a le Faamasinoga Maualuga sa faatūina i taimi o pulega a Siamani i lo tatou atunuu e ala i se court grant numela 167 o le tausga e 1895.
Ua ioe foi le Faamasinoga o Talosaga i le i’uga a le Faamasinoga Maualuga, o le motu sa lesitala ai le mokesi a le tagata e suafa ia Peter Laban i le tausaga e 1894, ma sa faamauina e le Komisi o Fanua le Land Commission ma le Faamasinoga Maualuga i lea vaitau.
O se tapenaga lea sa aiaia i le tulafono o Pelelini poo le Berlin Act i onapo o pulega faakolone a le malo o Siamani i Samoa.
O loo faaaogāina le motu o Namu’a i se tulaga faalisi i le taimi nei mo atina’e tau tulisi mo tagata tafafao.
O loo faailoa i le faai’uga tusitusia a le Faamasinoga o Talosaga, le umi o faagasolo lenei matāupu i le faamasinoga, ma o nisi foi o faamaumauga i pepa ua lē maua.
O le tausaga e 2008 na faamauina ai faaletulafono le avea o lea motu ma meatotino a le malo o Samoa ina ua pasia le tulafono o le lesitalaina o fanua o le tausaga 2008 poo le Land Titles and Registration Act le LTRA.
O le Loia Sili a le Malo ma le ofisa o le tausi mavaega sa molia e le itu talosaga.
