O le taunuuga o su’ega a le malo mo fanau a le atunuu mai lava i a’oga tulagalua e oo i kolisi maualuluga i le vaega o a’oga a le malo, ekalesia ma a’oga tuma’oti, ua faailoa e le Ofisa Sili o le matagaluega o a’oga ma aganuu, o loo maualuga pea le taumafai o le ituvai o tamaitai, ae pa’ū pea le faaletonu i le taumafai o le itupa o alii.

Faaalia e le Ofisa Sili o pulega o lea matagaluega le afioga A’eau Chris Hazelman ua oo lava i le faai’uga o su’ega a fanau e au atu ai i a’oa’oga o matātā eseese sa maualuga ai togi o le itupa o alii, ua maualuga ai foi togi o tamaitai.

O le Aso Faraile na te’a nei na feiloa’i ai le Ofisa Sili ma le vasega o tusitala sa faailoa ai le faai’uga o su’ega a le fanau sa su’e ai i le tausaga na te’a nei, lea sa molimauina ai mai togi sa maua e alii ma tamaitai i mataupu sa su’eina le tu maualuga pea o le taumafai o tamaitai ae faaletonu le itupa o tama tane.

O le faai’uga o su’ega o le SSLC mo fanau i le vasega Tausaga 12 o le 47 pasene o fanau e silia i le 3 afe iva selau na su’e o le 47 e au togi e 200 ma sili atu e avanoa ai ona faaauau i le vasega amata o a’oa’oga faaiunivesite i le Iunivesite aoao a Samoa.

O le 42 pasene mai lea lava aofa’iga e maua togi e ulufale ai i a’oa’oga faamatata eseese le TVET poo le Technical and Vocational Education and Trainning. 

O le feiloa’iga lava a tusitala ma le Ofisa Sili o le matagaluega o a’oga ma aganuu na faaalia ai e le afioga A’eau Chris Hazelman, e 696 fanau e lē o mafai ona maua o latou togi poo le faai’uga o a latou su’ega o le SSLC ona e le’i uma ona totogi pili.

O nisi ua totogi se vaega ae e le’i mae’a.