E lē o toe po se lilo i le tele o faalauiloa ma faatalanoaga ua faasolo i lenei vaitau i faigā filifiliga mo le malo ae ua vaaia foi le amata o tapenaga o sui tamomo’e o ē ua fia avea ma sui e faaleo mana’oga o o latou itumalo i faigā filifilga a itumalo poo local elections i Niu Sila nei.
E tusa ai ma nei tapenaga, o lea ua vaaia le maualuga o le numera o tagatānuu Pasefika e aofia ma Samoa ua sii aao e fia avea ma sui o o latou itumalo.
I lipoti ma le PMN, na faamauina ai e silia ma le to’a onosefulu i latou e iai faasinomaga i le Pasefika o le a tauva i le palota faalotoifale a Aukilani i lenei tausaga 2025.
O se numera tele lea ua faamauina, ma o se tulaga ua maitauina ai le to’atele o tagata Pasefika i Aotearoa Niu Sila o loo una’ia le iai o ni ta’ita’i Pasefika i totonu o aai o le atunuu, aemaise i latou o loo faaalia e lē o lagona lava so latou leo i faigā filifiliga ma le tele o faai’uga e aafia ai tagatānuu Pasefika.
Ua ta’ua i lipoti, o le silia ma le 40 o tagatānuu Pasefika o loo tausinio o i latou o loo tauva i tulaga tofi o laulauafono poo le Local Board i faaitu o Ōtara, Māngere, Manurewa, Henderson, ma Kaipātiki.
O loo vaaia le toe aga’i mai o nisi o sui e pei o Lotu Fuli ma Apulu Reece Autagavaia, ae ua māua o le a lē toe tamomo’e le tofa Tauanu’u Nick Bakulich ma le alii o Fale Andrew Lesā.
Faaalia e ui i se tele ai o lenei numera, ae o loo maitauina pea le lē lava o le numera o tagatānuu o le Pasefika e aofia i upufai o malo, aemaise o le tula’i mai pea o lu’itau o le laitiiti o numera o tagata e palota.
O se galuega o loo taumafai pea e faailoa le tāua o le palota i faigā filifiliga o le atunuu.