Ua taualuga le fono faaminisita a atunuu e 15 o le Pasefika sa talanoaina ai i lo tatou atunuu i lenei vaiaso auala e unaia atili ai le atina’e o fanauiti i le itu i a’oa’oga, le ola mālōlōina ma lo latou puipuigamalu.
O le Minisita o Tupe le afioga Lautimuia Afoa Uelese Vaai sa ta’ita’i i le usugafono a Samoa i lea faatasiga sa tauaofia i le faletalimalo o le Taumeasina, ma o se usugafono sa aofia ai sui o matāgaluega ma isi auaunaga tuma’oti a le malo.
Na faailoa e le Minisita o Tupe i le fonotaga, o lana tuualalo ma se lu’i i usugafono a atunuu, ia faamuamua loa galuega ma taumafaiga uma e siitia ai le atina’e o fanauiti, o le lumana’i tāua lea o soo se atunuu o le Pasefika.
E to’a selau fitusefulu sui o usugafono na auai e aofia ai Minisita ma Ofisa Sili o nisi o matāgaluega a malo o le Pasefika.
Sa auai foi usugafono mai nisi o faalapotopotoga tuma’oti o loo iai o latou sao i polokalame eseese mo le siitia o le atina’e o fanauiti ua amata ona ulufale i a’oa’oga tau amata.
