Ua molia nei i le tulafono se tama’ita’i 27 tausaga le matua i le leaga ona tausi ma le faatalalē ona tausi i se ‘alu’alutoto poo le ill-treatment/neglect of a child.

Faamanino e le Ta’ita’i Leoleo Asiasi o se leoleo su’esu’e faapitoa foi – Detective Inspector Simon Harrison, na valaau ane lo latou ofisa i le toe 10 minute i le itula e 12 i le aoauli o le Aso Sa, i le amataga o lenei vaiaso.

Na lipotia atu ai le maua o se pepe i totonu o le ‘atopa’u i luga o se pasi, a o iai i Kaiwaka. 

Ta’ua le alia’e o popolega o le avepasi ina ua vaai atu i le atopa’u o minoi, ina ua tatala atu e le avepasi le ato o inā na maua ai le pepe o loo i totonu o le ato. 

Na famatala e le avepasi, e tago atu e sii mai le pepe ua vevela lona tino ae o lona faafetaia e le’i āfaina sia ‘alu’alutoto. 

Na avatu o ia i le falema’i mo ni su’esu’ega ma iloiloga i le soifua mālōlōina o le pepe e ui e lē o i se tulaga e ono faapopoleina ai. 

Ua faafetaia e leoleo le galuega a le avepasi na faatino ua lavea’iina mai ai le ola o lea pepe, ma o latou faaalia ana lē seanoa ana gaioiga, e lē mailoa poo le ā se tulaga e oo iai, poo le fano ai o sia tamaitiiti.

O le asō e tula’i ai le tama’ita’i i luma o le Faamasinoga Faaitumalo i North Shore. 

Ua faamaonia mai foi, ua faafesoota’i ma ua faailoa i le Oranga Tamariki lenei matāupu. 

E lē o mailoa tonu poo lē ua aafia i le tulafono o ia e ona le pepe, ma faailoa o sia ‘alu’alutoto e 2 tausaga ma o se tama teine. 

O loo tālia nei taualumaga o su’esu’ega a leoleo.

Puna o Faamatalaga: https://www.rnz.co.nz/news/national/568865/toddler-found-in-suitcase-in-bus-luggage-compartment-woman-charged