O se isi lipoti lata mai o le faamasinoga o loo faagasolo nei o le tinā Korea lea ua molia i lona fasiotia o lana fanau e to’alua ma fafao o la tino oti i ni atopa’u, o le asō lea na amata faagasolo ai lenei faamasinoga i le Faamasinoga Maualuga a Aukilani, ma o loo tula’i lava le tama’ita’i o Hakyung Lee e tali mo ia, e lē o iai se loia o tula’i e finau mo lona faamasinoga.
Sa faamauina e le faamasino, Justice Geoffrey Venning le tali “not guilty” mo Lee, ina ua fiu le faamasino e fesili atu mo sana tali i le moliaga ae na o le saofa’i ma punou e aunoa ma se tali.
Na faailoa atu foi e le faamasino i le vasega o faatonu le jury, atonu o le a lafo atu ia i latou le tiute e va’ili’ili ai ma iloa pe sa faaletonu le mafaufau o Lee i le taimi na feoti ai se’i tulou lana fanau.
Ina ua tula’i le loia mo leoleo, Natalie Walker, na ia ta’ua ai, e lē o finau tetee mai Lee i le moliaga o lona faapogaia o le uma o ola o lana fanau.
Saunoa Walker, e lē o mautinoa mai i su’esu’ega a le foma’i pathologist le auala tonu na maliliu ai tamaiti; pe na mafua mai i ni fualaau na faainu ai e le la tinā ae o ni fualaau e lē talafeagai ona faainu ai fanauiti, pe na iai se isi auala na faauma ai o la ola.
E moni na maua ai ni vaega o drugs i tino o tamaiti, ae lē o mafai ona faamaonia atoatoa ai ona o le umi o le taimi lea talu ona maliliu tamaiti.
O Lee sa nofo i Papatoetoe, ma i faamatalaga o lenei matāupu, o loo otooto uma ai gaioiga eseese na faia e Lee ina ua maliliu lana fanau, e ala i le suia o faamatalaga e iloagofie ai o ia i lona laisene avetaavale, ua suia ona foliga i le sikaili o lona ulu ma suia foi lona igoa e fai ai lona tusifolau fou e alu ai i Korea.
O lenei faamasinoga o loo taumafai ina ia faamautinoa e aunoa ma se masalosalo pe faamaonia le solitulafono a Lee o le fasioti tagata faamoemoeina.
O se stand-by Council Lorrainne Smith o loo fesoasoani ia Lee a o taumafai e finau mo ia lava, na ia ta’u atu i le vasega o faatonu, e telē se faaletonu o le mafaufau o Lee ina ua maliu lana tane i le 2017.
O le fesili lea a Smith i le vasega o faatonu, pe faamata na lelei pe sa lē lelei le mafaufau o Lee i le taimi na ia fasiotia ai lana fanau?
O loo faagasolo pea lenei faamasinoga.
Puna o Faamatalaga: https://www.rnz.co.nz/news/national/572536/anti-depressant-drug-found-in-bodies-of-two-children-left-in-suitcases
