Poo le 3 i le vaveao o le aso ananafi, na maitauina ai e leoleo se taavale ua matua’i saosaoa tele le alu i luga le auala tele nai lo o le saoasaoa faatulagaina i le auala o Titirangi.
Na ta’ua e le faatonu o le pou i Waitematā West Area Prevention Inspector Kelly Farrant, na faailo atu leoleo i le taavale e tu, ma e faamauina sa mafai ona taofi ma tu lea taavale, ae peita’i na faate’ia le to’atele i le faaalia ai o uiga faafiufiu ma le ‘ava’avau o le avetaavale i le leoleo.
Sa faailoa foi le lē fia tali ane o pasese na i totonu o le taavale ina ua fesiligia e leoleo i latou mo a latou faamaumauga.
Ae na maitauina i sa’ili’iliga a leoleo, na iloa ai o le tasi o pasese o loo iai se tusi saisai mo le taofia ai o ia, ma o lea na pu’e faapagota ai loa lea pasese.
I le aveese mai ai o le alii lea mai le taavale na iloa atu ai loa e leoleo se tama’i fana o le ituaiga o le small handgun ma ni ututau i le itu e mālōlō ai vae i totonu o le taavale.
Ma na ta’ua le vave ona tali o malu o malo e aveese ma le saogalemu lenei auupega mata’utia.
Ua faamauina o le lona lua ai lea o laau malosi na maua e leoleo a o faatino ai a latou petolō masani i le aso e tasi, e pei ona lipotia o le tasi o laau malosi o se sawn-off shotgun, na maua e leoleo i le faaitu o Manurewa mai se tasi o taavale a se tagata e i le li’o o kegi a o faasolo ai galuega masani a leoleo i luga o le alatele, le traffic stop.
E 27 tausaga o se alii o le a tula’i i luma o le Faamasinoga Faaitumalo o Waitākere e tali i lana moliaga o le umia faasolitulafono ai o se laaumalosi, umiaina o fualaau faasāina methamphetamine, o le umiaina o laau faasāina o le mariuana, ma lona lē usita’ia o aiaiga o le tatala ai o ia i tua.
E 54 tausaga o le isi alii o le a tula’i i luma o le Faamasinoga Faaitumalo i Manukau, e tali i ona moliaga o lona umiaina faasolitulafono ai o se laaumalosi ma ututau, ma lona umia ai o laau faasāina o le mariuana.
Puna o Faamatalaga: https://www.facebook.com/share/p/1B6yc7wm7f/
