Na maua e le aufaigaluega a le faletalimalo o le Tanoa Tusitala le tino, o le alii pailate o le vaalele o le Virgin Australia i lona potu ua maliu i le taeao o le Aso Sa poo le 10 i le taeao.
Sa faailoa mai e le Sui Komesina o Leoleo, Papalii Monalisa Tia’i Keti o loo masalomia na uma le ola o lea alii ona o ni manu’a na faaoo e ia ia te ia lava.
O lē ua maliu o se tagatanuu o Ausetalia ma e 64 tausaga o le soifua.
O le taimi nei o loo faaauau suesuega a leoleo i lea mataupu ma e fesiligia le afioga i le tamaitai Sui Komesina poo le tolu i le afiafi o le asō, ae o loo iai i lea taimi le ofisa suesue o leoleo CID i le falemai i Motootua mo galuega faagasolo faatasi ma le pule o maliu e faatatau i lea faalavelave.
Na faailoa e leoleo, na latou faatoa iloa le faalavelave ina ua fesootai atu le vaega o le fuimu, le FESA e faapea na fesootai iai le faletalimalo, ma agai mai loa iai le vaega suesue a le Matagaluega o Leoleo.
O le lona lua ai lea o faalavelave i lenei vaitau ua maliliu ai tagatanuu o atunuu i fafo, ma maua i Samoa nei.
E lei mamao atu na maliu ai se alii kapeteni o se vaa fagota, o se tagatanuu o Niu Sila, i luga o se vaa fagota a o iai i faigafaiva, o lea alii sa aumau ai i Samoa nei talu mai le tausaga 2011.
