Ua faamaonia mai le faai’uina ma le manuia ai o se galuega tuufaatasi a le Ofisa o Tiute ma le Matagaluega o Leoleo o Waikato ina ua maua ma taofia le tele o fualaau faasāina, na faamauina sa oka ma faatauina mai i maketi faavaomalo ma aumai faananā i totonu o Niu Sila, ma le faamoemoe e faatau atu i le maketi i totonu o Waikato.
I se pepa o faamatalaga na ta’ua ai e le Ofisa o Tiute, lo latou maitauina pea o le maualuga o le numera o fuala’au faasāina o le Fantasy poo GBL e iloa ai e le toatele, ma le fualaau faasāina e ta’ua o le 1,4-B, ma e faapea e tai tutusa lelei ma le GBL. Ma o le ala lea na amata ai loa s’esu’ega a auaunga nei a le malo, e tau tilotilo poo fea tonu o loo agai mai ai nei fualaau faasaina.
Ta’ua o le Aso Lua na faatautaia ai ni osofaiga a leoleo ma le vaega o tiute e faaaoga ai ni pepa faataga, o search warrants i ni fale poo residentials ma ni fale e teu malu ai ni meatōtino poo storage facilities e 2.
Ma i nei sailiga ma osofaiga na maua ai le 4 Lita o 1,4-B, 129 o laau faasāina o le maruana, 1 kilokalama o fatu maruana ma le 100 o fuala’au ua faaigoaina o le BZP. Ta’ua le maua ai o le tele o ututau i nofoaga uma na faia iai o osofaiga.
E le gata na maua fualaau faasāina mai osofaiga ae na taofia foi le oo atu i le 3 lita o le GBL i itu tuaoi.
Ua taofia ma molia nei e leoleo se alii 42 tausaga le matua ma se tamaitai 41 tausaga le matua i le tele o moliaga e aofia ai le aumai i totonu o le fualaau faasāina o le i lona ituaiga o le Fantasy ma le tufatufaina atu o lea ituaiga fualaau faasāina, tufatufaina atu o pauta faasāina o le methamphetamine ma le totōina ma le faaolaina o laau faasāina o le maruana ma tufatufaina atu.
Ua lapata’ia nei e leoleo tagata o loo mafaufauina e faatau fualaau faasāina nei e faaaoga ai auala o fesootaiga tele vavave poo le intaneti o loo mata’ituina lelei e i latou e le auaunga.
Ma le fautuaga e lē mafai ona lafi se tasi i tua o auala o fesootaiga nei.
Puna o Faamatalaga: https://www.customs.govt.nz/about-us/news/media-releases/gbl-1-4-b-cannabis-and-bzp-uncovered-in-joint-operation
