Ua faamae’ina nei se malaga asiasi a le tama’ita’i Minisita o Tiute ia Casey Costello i le malo o Fiti.
Ua faamauina o lana malaga atu i le atunuu o le amana’ia o le faigāpaaga a atunuu e lua.
O nisi vaega na laualuga i le malaga a le tama’ita’i Minisita, o le taga’i i galuega mo sana puipuiga o itu tuaoi, o vaega o tiute faapea puipuiga ma leoleoga o le gataifale.
A o iai Casey Castello i lana faigāmalaga, na māua ai lona asia o le vaega o maile sosogi a leoleo Police Dog Base i Suva, ma faasoa ai i tulaga o le tāua o galuega a leoleo ma a latou maile sosogi i le puipuiamalu o tuaoi o le atunuu ma le Pasefika, e ala i le polokalame ua ta’ua o le Pacific Detector Dog Programme, e pei ona faailo o se faigāpaaga ua 64 tausaga o faatino mai.
Sa maua le taimi a le minisita e asia ai le vaega e puipuia ma leoina gataifale o le atunuu le Maritime Essential Services Centre lea na ia feiloa’i atu ai i le Ta’ita’i o le Vaega’au poo le Navy a le malo o Fiti.
E pei ona o la faasoa ai i le galuega a Niu Sila ua faaigoaina o le New Zealand’s Bluebottle uncrewed surface vessels.
O loo tuuina atu ai le lagolago mo Fiti i le leoina ma le mata’itūina o ona ogasami ma gataifale.
Sa ia feiloa’i atu foi i le Pule Sili o le Auaunaga o Tiute ma Tupe Maua a le atunuu ma ana pā’aga.
Ma i lea feiloa’iga na faailo ai e le tama’ita’i Minisita o Casey Castello le tuuina atu pea o le lagolago a Niu Sila e saga faamausalī ma mauaa ai galuega faatino a vaega o le tiute aemaise o le fesoasoani i ta’iala.
I le la feiloa’iga ma le alii Sui Palemia o le malo o Fiti, Professor Biman Prasad, na faapea ona la faafesoaa’i i le malosi ma le mausalī o le faigāpaaga a atunuu e lua aemaise o galuega fai faatasi o loo faaalia ai le alagatutusa o manatu ma lagona i le puipuia pea o atunuu mai le tele o aafiaga ma taifana’e o loo aafia ai le Pasefika i lenei vaitau.
Puna o Faamatalaga: FACEBOOK: New Zealand High Commission, Suva, Fiji
