E ui ina umi le mālōlōga a fanau ona o puipuiga i le pepesi o le faama’i fiva o ponaivi, ae sa maua le avanoa o fanau e to’alima sa tuuina atu a latou ata tusi i le tauvaga a le matāgaluega o le soifua mālōlōina sa autū i le aso e faatāua ai le saogalemu o taumafa i le lalolagi.
O se tauvaga sa lilifa i fanau i a’oga tulagalua i le atunuu lea sa tuuina atu a latou ata tusi ma faaupuga e faailoa ai le tāua o le saogalemu o taumafa.
O se taumafaiga lenei o loo lagolago malosi e le faalapotopotoga o taumafa a le lalolagi le F.A.O. poo le Food and Agriculture Organisation i se faigāpaaga e galulue faatasi ai ma le matāgaluega o le soifua mālōlōina.
O fanau sa faamanuiaina a latou ata tusi poo posters, o Sharleen Sepasitiano, Vala Fagatuai, Senio Peseta, Valerie Mafulele ma Lafulafu Fagatuai mai a’oga tulagalua o St Marys Primary School, Vaivase Primary School, Siumu Primary School, Divine Mercy Primary School, ma Marist Brothers Primary School.
Ua faafetai ai le pulega a le Matāgaluega o le Soifua Mālōlōina i pule a’oga ma mātua i le lagolagoina o lea faamoemoe mo alo ma fanau a le atunuu.
