Ua taofia nei e le vaega o Tiute poo le Customs se taule’ale’a e 26 tausaga le matua mai Kalaiesitete, ma ua molia i lona taumafai e ave faananā ni pauta faasāina e faaaogā ai ni aseta.
Faamauina i se pepa o faamatalaga mai le Customs New Zealand, na faaaogā e lenei alii se pusa o le taaloga o le mū poo le chess board, faaaogā foi se maa o lana pasika, ma ni air fryers.
Ta’ua e le ofisa o tiute mai su’esu’ega ua mātauina ai e iai sootaga a lenei alii i nisi foi o matāupu i le ave faananā ai foi o fualaau faasāina i itu tuaoi, e faaaogā ai faamomoli e avatu i pusameli mai le masina o Mati 2024 se’ia pā’ia mai le masina o Aperila o le tausaga nei 2025.
Māua o ia faamomoli na kiliva na ave atu i le tele o nofoaga i Kalaiesitete.
Faamanino e le vaega o tiute, na o latou mata’itūina lelei tulaga o nei gaioiga faasolitulafono, talu mai le tausaga na te’a nei, ma na faamauina ai lo latou galulue soosoo tau’au ma le tele o sui o le International Mail Centre.
Faaalia na amata taofia ai le tele o faamomoli mai Amerika.
I talaaga o lea su’esu’ega, ina ua mautinoa a latou iloiloga i gaioiga, o lea na faatino ai loa se sa’ili’iliga a faaaogā ai se poloa’iga poo se search warrant i le fale a lē ua molia i le aso ananafi ma taofia ai lana telefoni ma le masini komepiuta.
I galuega su’esu’e a le vaega o tiute i pauta faasāina ua taofia i le matāupu a lē ua molia, ua faamaonia e tusa ma le 1.64 kilokalama le mamafa o le pauta methamphetamine, ma e tusa ma le $494,000 Niu Sila lona tau i le maketi.
Puna o Faamatalaga: https://www.customs.govt.nz/about-us/news/media-releases/checkmate-by-customs-over-methamphetamine-smuggling
