O le Aso Tofi o lenei vaiaso na folasia ai le paketi mo le tausaga faaletupe a le malo 2025/2026.
I lea vaega tāua i le atina’e o le atunuu, na faalauiloa ai e le Minisita o Tupe, se vaegatupe o lenei paketi o le a faaagaga mo le toe faaleleia o le maota gasegase poo le falema’i o le itumalo o Nelson.
Na faapupula e le alii Minisita o le Matāgaluega o le Soifua Mālōlōina ia Simeon Brown, o lenei seleni mai le paketi e lē gata ina faaleleia ai le tele o itu o le falema’i, ae o le a maua ai le oo atu i le 128 o moega fou, mo ma’i e taofia atu i le falema’i, 41 moega ua siitia ai le numera nai lo o le taimi nei.
Ta’ua e Brown, o lea vaega tāua o le a mafai ona tali atu ai i le faatupula’ia o le numera o tagata e autovaa atu i le maota gasegase.
E ui e lē o manino tonu le aofa’iga o le tupe o le a faamatuu mo lea fuafuaga tele, peitai ua faaalia le patipatia ma le talia ai e le Pulenuu o Nelson ia Nick Smith o le fuafuaga ua faataoto nei.
Na faailoa e Nick Smith o se fuafuaga aupito i telē lava lea a le malo ua faatino mo lea faaitu.
Ae e ui i se talia ai e le Pulenuu o lea faaitumalo o le fuafuaga ua folafolaina mai e le malo, ae ua upuia e le sui Faipule a le Leipa i Nelson, o Rachel Boyack le malo ma le latou paketi.
Ta’ua e Boyack e lē o iai se manino i le seleni ma a latou folafolaga e maua e le itumalo.
Faamanino e le sui Faipule, e 1 piliona le aofa’i atoa o le tupe lea ua folafola e faatino ai galuega faaleleia o galuega tetele o falema’i i Ueligitone, o Aukilani ma Nelson, ma i lona iloa e lē o manino lelei pe fia sa’o le tupe ua faaagaga mo Nelson lava ia.
I le eseese o finagalo o ta’ita’i o le itumalo o Nelson, e pau le itu o le a iloa ai le telē ma le laitiiti o le tupe mo galuega tetele o Nelson, o le tālia ai o le amatalia o galuega i se taimi e lē o toe mamao.
Puna o Faamatalaga: https://www.1news.co.nz/2025/05/23/budget-2025-nelsons-leaders-divided-on-hospital-news/
