O le po anapo na molimauina ai e tagatānuu o le faaitu i Saute o le atunuu le mata’utia o aafiaga o se asiosio.
Māua i lipoti na matua’i faaleagaina le tele o maota ma laoa o tagata, e pei ona molimauina i ata ma faasalalauga le tele o fale ua leai ni taualuga, ua faaleagaina nisi o vaega o fale, ma laau ua pa’u’ū faapea meatotino poo trampolines ua felelei solo ma faaleagaina ai pou molī.
O faaitu na faamauina le aafia, e aofia ai Nawton, Dinsdale, Clevedon, Mangatangi, ma Hamilton.
Na maitauina foi le motusia o le eletise i le 174 o aiga i Melville.
Ma i lipoti mai le 1News na faailoa ai le amata ai o galuega fesoasoani a sui o le Civil Defense, o le Tineimu ma fesoasoani muamua, e lē gata i lea o sui o le puleganuu poo le council e amata fesoasoani i nai aiga ma tagata e taumafai e tapena vaega ua faaleagaina e lenei faalavelave faalenatura.
Na ta’ua e nisi o tagata e alala ma pāpāa’ao i nei faaitu le mata’utia o vaaiga i le po anapo, i le tele o meatotino ma vaega o o latou fale na faaleagaina.
Ae mai le Ofisa o le Vaaitau, na o latou faamaonia ai le tugā o aafiaga e ono fetaia’i ma aai na lipotia le aafia.
Ta’ua e le sui o le ofisa ia Heather Keats, i lona tilotilo i aafiaga ua matua’i maoa’e ma mata’utia o foliga vaaia ma vaega ua faaleagaina ona o le asiosio.
Puna o Faamatalaga: https://www.1news.co.nz/2025/05/30/roofs-damaged-trees-uprooted-as-tornado-hits-hamilton/
