E toafitu le autaalo a Samoa ua masii e tausinio i taaloga a tupulaga talavou o Malo o le Taupulega le Youth Commonwealth Games o loo faagasolo i le vaiaso nei i le atunuu o Trinidad and Tobago i le Atu Kerepeane.

O le autaalo a le atunuu e toatolu o loo tausinio i le taaloga o tuuga aau lea na tausinio ananafi ae e lei maua mai se faaiuga, ma le toafā o loo tausinio i taaloga afeleti e pei o le togiina o le ipu mafolafola le discuss, ma taaloga taufetuli o le 100 ma le 200 mita.

O le taaloga o le aau e toalua o loo tausinio i le vaega o le 50 ma o le selau ma le 200 mita i le backstroke ma le freestyle.

E toatasi le tamaitai ae toalua alii o loo tausinio i le aau o i latou ia o le tamaitai o Salani Saaga 15 tausaga le matua, o le alii o Hector Junior Langkilde 18 tausaga ma Solomon Galbraith 17 tausaga le matua.

O le auafeleti e toafā ua aofia ai o Mykayla Sola ma Shera Jayjay, ma alii e toalua o Asalemo Fanolua ma Timothy Magalogo.

O le aso 4 o le masina nei na amata ai taaloga nei ma le faamoemoe e mae’a i le aso i le aso 11 le Aso Faraile o le vaiaso nei.

O le faatoa toe faia lea o taaloga a tupulaga talavou o Malo o le Taupulega talu mai le lata i le 3 tausaga o tapunia tuaoi o atunuu ona o le faamai koviti.

O taaloga muamua foi a tupulaga talavou o malo o le taupulega ua faagasolo i le tuanai o le tuumalo o le Tupu Tamaitai o Elisapeta II sa faaao iai Malo o le Taupulega, ma le tulai mai o le aloalii o Salesa ua mae’a faauu e avea ma Tupu o Peretania ma ia faaauau ona tauave le tofiga o le faaao o Malo o le Taupulega.