E ui ina utiuti le faasoa a le malo tausi ona ua teena le fuafuaga tau tupe lea na tuuina atu i le fono a le Palemene talu ai nei, ae ua mafai lava ona faasoa atu se vaegatupe e tusa ma le 168 afe tālā mo le tapenaina o le ‘autaaalo a Samoa mo taaloga laiti a le Pasefika e faia i Palau i le faai’uga o le masina nei.
O le Minisita o Taaloga ma Alaga’oa mo le Fiafia o Tagata, faapea le Komesina Maualuga o le malo Ausetalia, o malo valaaulia ia i le sauniga na faalauiloa aloa’ia ai le ‘autaaalo e 57 e aofia faia’oga ma ta’ita’i o le ‘au.
Faaalia e le Pelesetene o taaloga a Samoa le afioga Tuaopepe Jerry Wallwork o le a ave atoa le malosi ma le taumafai e sa’ili ai ni pine mo le tapua’iga a le atunuu, ae o lana lu’i i le ‘au ia maua ni pine se 49.
I le 12 o taaloga mo taaloga laiti a le Pasefika i Palau e na o le iva taaloga o le a tausiniō ai Samoa e aofia ai taaloga afeleti, siisii u’amea mamafa, volipolo i le matafaga, o le alo vaa, fanafana ‘aū le archery, taaloga o le basketball i ‘au a alii ma tamaitai, taaloga o le aau, taaloga o le pii le wrestling, ma le taaloga o le triathlon.
