Ua faamauina nei i talafaasolopito i le sa’iliga o le siamupini o taaloga afeleti a le lalolagi poo le World Athletics Championship sa faia i Tokyo i Iapani i le faai’uga o le vaiaso, le manumālō ai o se ulua’i tagata mai le Pasefika ae o se tamafanau a Samoa i le pine apamemea i le taaloga o le togiina o le ipu salafalafa poo le Discus.
O le alii o Alex Rose na ia ausia le mamao e 66 tesimale 96 (66.96) mita le mamao o lana togi.
I se faatalanoaga ma le leitio faavaomalo a Niu Sila na faailoa ai e Alex lona mitamita i soo se taimi e fai ai o ia ma sui o Samoa.
O Alex na fanau ma soifua ane i Amerika ina ua malaga mai si ona tamā mai Samoa i le 19 o ona tausaga ma nofo ai i Amerika, ma o lona tamā lea na maua ai e Alex lona sitiseni Samoa.
Ua 33 nei tausaga o le soifua o Alex, sa taalo foi i taaloga o le soka ma le basketball i a’oga ma amata mai ai ma le a’oina o le togi i le discus, ipu salafalafa.
E faatolu ona tausinio Alex i taaloga o le Olimipeka, e aofia ai le Olimipeka i le tausaga talu ai i Paris i Falani lea sa tulaga 12 ai.
Ua ave ai le faamālō a le Pelesetene o le faalapotopotoga o taaloga a Samoa le SASNOC i le taumafaiga a lea alo o le atunuu ua ia sii maualuga ai Samoa i taaloga afeleti sa’ili siamupini a le lalolagi.
Faaalia e le Pelesetene le afioga Tuaopepe Jerry Wallwpork i le upega tafa’ilagi mo taaloga afeleti a atunuu o le Oceania,.. “Congratulations Alex Rose, what a fantastic performance history in the making. Mālō le tauivi. Mālō le lotonuu. Foi le viiga I Le Atua. Outstanding”.
