Ua maua e le asosi o vai tuma’oti a Samoa le faailoga taualoa o le auaunaga lautele pito silisili ona lelei le best customer service award, i le tufagā faailoga a le faalapotopotoga o vai a le Pasefika e faaigoaina o le Pacific Water and Waste Water Association sa faia i Honiara le laumua o le atunuu o Solomona.
O sui o le polokalame a le asosi o vai tuma’oti a Samoa sa auai i lea faatasiga mo le taliaina o le faailoga taualoa lea e maua foi e asosi o vai tuma’oti a atunuu o Palau ma Tahiti lea faailoga taualoa.
O le polokalame o vai tuma’oti i Samoa o loo mafai ona tuuina atu le vaaia o ia suāvai maua e vaai ma pulea e tagata o nuu ma afio’aga o le tatou atunuu o loo maua lea faamanuiaga tāua.
O se polokalame foi o loo mafai ona a’oa’oina ai tagata o nuu ma afio’aga o aofia i lea polokalame i auala eseese e mafai ona puipuiamalu ai o latou suāvai o loo pulea lava e latou.
O nisi o vai tuma’oti i Samoa ua faatino ai le auaunaga o le mitaina o le suāvai o se faiga ua mafai ona faasao lelei ai le suāvai, ma avanoa ai isi tagata ona latou maua le suāvai mamā ma saogalemu mo le faaaogāina.
O nisi o lu’itau o feagai ma le polokalame o vai tuma’oti o le utiuti o seleni maua e nuu ma afio’aga e faia ai galuega o le faaleleia o nofoaga o loo maua ma teu ai le suāvai.
