O se matāupu tau faamasinoga sa su’esu’eina ai se tagi a se tama’ita’i sa galue i le Matuaileoo Environment Trust Incorporated poo le METI, ua folasia ai se faai’uga ua faalēaogā ai le finauga a le itu tagi lea sa molia ai lea auaunaga tuma’oti e lea tagata faigaluega, i le solitulafono o le faate’aina o ia mai le galuega ua 11 tausaga o galue ai.
I faamaumauga sa tuuina atu e lē na tagi o Aloema Leaupepe sa finau ai e solitulafono le faate’aina o ia ona sa tatau ona maua uma ana faamanuiaga e tusa o aiaiga a le faalapotopotoga sa galue ai.
Na mafua le faai’uga ona o le lavea o le taavale a le faalapotopotoga tuma’oti, lea na faia ai le faai’uga a le Komiti Faatonu o loo pulea le METI e faamuta le auaunaga a lē na tagi ona ua ia solia aiaiga e lē tatau ona ia faaaogā se taavale a le faalapotopotoga i taimi ua mānava galuega.
E iai ma isi amio a lē na tagi o loo faailoa i le tusi a le faatonu o le METI le susuga Dr Waletr Vermullen, na māfua ai ona talia e le Komiti Faatonu le faamutaina o le toe faafaigaluegaina o Aloema.
I le iloiloga a le Faamasinoga Maualuga o le matāupu lenei na tauuu ai i le faai’uga e teena ma faalēaogā le tagi ona o loo talafeagai le faate’aina o lea tagata faigaluega ma māfua’aga na faavae ai.
E faamuta le galuega a lē na tagi ua oo lona totogi i le $40,000 afe i le tausaga.
Ua faatonuina e le faamasinoga e totogi e le itu na faauluina le matāupu le tau o le faamasinoga mo le faalapotopotoga sa ia molia.
