E ui o le Aso Gafua o le a faato’ā faia ai le faitauga faai’u ma o le faitauga aloa’ia foi lea o le faigāpalota a le atunuu e pei ona sa faataunuuina i le aso ananafi, 29 Aokuso 2025, ae o anapo lava na maitauina ai le to’atele o sui o le vaega faaupufai a le Faatuatua i le Atua Samoa ua Tasi poo le FAST na manumālō mai i nofoa o o latou itumalo.
O le feiloa’iga a le ta’ita’i o le FAST le susuga ia Laauliolemalietoa Leuatea Polotaivao Fosi Schmidt, o ia foi o le a avea ma Palemia o Samoa i le paeaiga lona 18 o le a amata, ma a latou aulagolago uma sa taputapua’i atu i le Maota o Samoa i Vaitele, na saunoa faafetai ai Laauli ma ia ta’ua ua maua e le Faatuatua i le Atua Samoa ua Tasi nofoa e 33 ae o le a se’i faatali nisi o faamasinoga e ono faia i nisi o nofoa, i se taimi o i luma.
O sina otootoga puupuu e le’i aloa’ia o le i’uga o le faigāpalota na tuua mai ai anapo, o lea ua toe manumālō uma mai ta’ita’i o vaega faaupufai autū nei e tolu, e pei o le susuga Laaulialemalietoa mo le FAST, le afioga Fiame Naomi Mataafa mo le SUP, ma le susuga Tuilaepa Lupesoliai Sailele Malielegaoi mo le HRPP.
E le’i manuia taumafaiga a isi uma ta’ita’i o isi tama’i vaega faaupufai.
O isi sui o le FAST e lē o manumalo mai i o latou nofoa i le faitauga muamua lenei, e aofia ai le afioga ia Leota Laki Lamositele Sio, o le sui ta’ita’i lea o le vaega faaupufai, ae ua maua i ulua’i faamaumauga, ua manumālō mai le nofoa lea o Palauli 2 le isi lava sui mo le FAST, le fetalaiga ia Fiu Faaolatane Tuala Iona Pa’ō.
E lē o toe foi mai le afioga i le Fofoga Fetalai, le susuga Papalii Oloipola Ta’eu Masipa’u, ina ua manumālō i le nofoa lea o Faasaleleaga 3 le fetalaiga Namulauulu Papalii Sami Leota.
E lē o manuia mai foi le taumafaiga a le afioga Tuu’u Anasii Leota mo le nofoa o Siumu, e le’i manuia foi le taumafaiga a le fetalaiga a Seumanu Saunoaimalu Nuu Faimata Su’a i le nofoa o Faasaleleaga 1 ae o loo manumālō mai ai le isi lava sui o le FAST, le afioga Leatigaga Matāfai Lauina I’iga.
O le isi nofoa ua mamulu a le FAST mai le faitauga muamua, o le afioga Magele Sekati Fiaui mo Faasaleleaga 2, lea e manumālō mai ai le sui o le HRPP, le afioga Vaaelua Senetenari Samau, o le afioga Tagaloatele Pasi Poloa o Sagaga 4, ua manumālō mai ai le sui o le HRPP, le afioga ia Lefue Tofilau Pelenise Lelevaga.
O le asō lea ua faatulaga e faitau ai palota faapitoa ma palota na mua’i fai i le Aso Lulu talu ai, ae o le Aso Gafua ua faatulaga e faia ai le faitauga faai’u ma o le faitauga aloa’ia foi lea, ma iai le talitonuga e ono toe suia ai faai’uga mo nisi o itumalo.
