E lē o mālōlō lava galuega faatino a auaunaga a le Matāgaluega o Leoleo ma Ofisa o Tiute e taumafai e taofi le tele o gaioiga fasolitulafono tau nakoti mai le oo mai i laufanua o Niu Sila, e pei ona vaaia ai le tele o galuega faatino.
Ae o lea foi, ua faamaonia mai le mae’a ai ma le manuia o se tasi o galuega tele faavaomalo na galulue ai auaunaga a Niu Sila ma ana paaga mai Amerika, Singapore, Brunei, ma Ausetalia e taofi ma faamuta le faaauau ai o faatinoga solitulafono a vaega soofaatasi ua ta’ua o le syndicate mai le tufatufaina ma avatu faananā o fualaau faasāina o le ‘aisa, le methamphetamine i totonu o atunuu e aofia ma Niu Sila.
E tusa ai ma se pepa o faamatalaga mai le Ofisa o Tiute na faamauina ai, e faaaogā e le syndicate faamomoli o masina ma le tele o oloa siiatoa e nanā ai i totonu le pauta o le methamphetamine.
O le mea mata’utia i taumafaiga a lea vaega soofatasi, o a latou gaioiga e pei ona eseese ai o auala e lafo ai faamomoli; e faapea e faaaogā meli ma ofisa faapitoa tau faamomoli ina ia ‘aua ne’i mate’ia e auaunaga a malo ia faiga faasolitulafono ma le itu ma le nofoaga o loo aga’i atu ai nei faamomoli.
I faamatalaga na ta’ua ai o le va o le masina o Novema o le tausaga e 2024 ma le masina o Aperila o le tausaga nei 2025, na maua ma taofia ai e sui o ‘au su’esu’e a le malo o Brunei le oo atu i le 49 kilokalama o le ‘aisa poo le methamphetamine na fuafua mo le tele o itu o le atunuu.
O Singapore e faamauina e 10 kilokalama le mamafa o le ‘aisa na taofia i le masina o Aperila o le tausaga nei; faaopoopo atu ai ma le galuega a Niu Sila i le masina o Aperila ma Iuni o lenei tausaga, lea na maua ma taofia ai le 10 kilokalama o pauta faasāina e pe a ma le $3 miliona lona tau pea faatau atu i tua.
O Ausetalia lava ia na o latou taofia le oo atu i le 40 kilokalama o fualaau faasāina i le masina o Me o le tausaga nei 2025; ma e māua e $37 miliona tālā lona tau pe a faatusatusa i tau e ono faatau ai i le maketi.
I le aotelega o galuega faatino a auaunaga a malu o le malo ma le tiute e 90 lelei taumafaiga a sydicates na faalavelaveina ma taofia mai le oo i totonu o atunuu na faipaaga i lenei galuega tele, ma le to’a 16 o tagata na pu’e faapagota e leoleo i Niu Sila nei.
Faamauina o as’ili’iliga, o loo masalomia e auaunaga nei, o le atunuu o Mexico lea e afua mai ai poo lea e aumai ai nei fualaau faasāina, ona faasolo ai lea o le aumaia faananā i Amerika, ma aga’i sa’o mai i atunuu Asia ma le Atu Pasefika.
Puna o Faamatalaga: https://www.customs.govt.nz/about-us/news/media-releases/international-cooperation-disrupts-global-drug-trafficking-syndicate-arrests?fbclid=IwY2xjawM-lS9leHRuA2FlbQIxMABicmlkETFrNGpPOG9tMGNUbVRVNzlNAR5XTaTTm4cJ1H1hdV4_XXN4FpJ–z7KFQsrZ9YG_RKCBTYvieeU_cGH2DW3Ag_aem_mRsqBGdH5-6dKQZEQIjCig
