I se galuega tuufaatasi a le matāgaluega o leoleo ma le Ofisa o le Tiute e faaigoaina o le Operation Matata ua mafai ai ona maua gaioiga solitulafono a se tasi o vaega ua faaigoaina o le crime syndicate i le tele o itu tuaoi, e aofia ai ma kegi, ma ē o loo galulue i malaevaalele o loo faatino le tele o faiga faaālatua ma le solitulafono i le aumaia faananā ai o fualaau ma pauta faasāina i totonu o Aotearoa nei.
Faamauina i se lipoti mai le Ofisa o Leoleo i Counties Manukau o loo tuua’ia le vaega lenei i le tuu ai o se ‘atopa’u o loo iai totonu fualaau faasāina; ma o loo faia e aunoa ma se isi o vaaia, pe iloa ai na malaga atu ma se tagata malaga ma aumai i malaga faavaomalo.
Na tauala mai lenei ‘ato i faigāmalaga na ui mai Kuala Lumpur Meleisia, Bangkok Thailand, Santiago Chile, Honolulu Hawaii, Los Angeles, San Francisco ma Niu Ioka i Amerika.
Ma i le taunuu mai ai i Niu Sila, na aveesea ai e tagata faigaluega i le malaevaalele o baggage handlers.
E lua faatinoga o lea galuega tele na fai e pei ona faamauina o le tasi na faatautaia i le masina o Iuni o le tausaga 2024 ma le aso 30 o Iulai o le tausaga nei 2025.
Ma e tusa ai ma su’esu’ega i lenei galuega tele, na māua ai, le oo atu i le to’a 27 tagata na pu’eina ma taofia.
E 631 kilokalama o le pauta faasāina o le meth pe tusa ma le 31.5 miliona o le fua ma lona aofa’iga, ma le oo atu i le $220.8 miliona tālā le tau pe a faatauina atu i le maketi.
E 112 kilokalama le pauta faasāina o le cocaine na taofia, e 1.2 miliona le aofa’iga ma lona tau e tusa ma le $50.4 miliona tālā.
O le tasi o itu na tula’i mai i le masina o Iuni, na lipotia mai ai, sa iai se alii e le’i iai se faatagaga e na te uia pe ulufale ai i se tasi o itu e aga’i atu i le itu e iai ‘atopa’u a le ‘aumalaga.
Ma e faapea sa ia aga’i e aumai le 50 kilokalama o fualaau faasāina o le meth.
E 19 ni osofa’iga e faaaogā ai ni pepa faataga, o search warrants i totonu o Aukilani.
Ma taofia ai pe ā ma le $150,000 o tupe.
I le faatautaiga o su’esu’ega na faaalia ai ua faaaogā lē tatau e i latou nei o latou tofiga ma tulaga i galuega e faatino ai gaioiga faaālātua ma le solitulafono, ma ua latou lē tilotilo lava i le saogalemū o le atunuu ma ona lotoifale; ua latou lē vaai alofa lava i le tulaga pagātia ua iai le to’atele aemaise ē loo aafia i fualaau faasāina, drug addiction; peita’i ua latou manatu faapito lava iai latou.
Ua faamanino mai le galulue soosootau’au ai o auaunaga e lua ma le pulega o le malaevaalele faapea a latou pā’aga mai atunuu i fafo ina ia saga faamalosia puipuiga i itu tuaoi ma taofia i latou o syndicates mai le toe mafai ona aumai ni nakoti i totonu o le atunuu.
Puna o Faamatalaga: https://www.facebook.com/share/p/1KAJCKREcr/
