E tusa ai ma galuega faatino a le ofisa o Leoleo ma le Ofisa o Tiute, o lea ua faailoa ma faamaonia mai nei le manuia ai o sa’iliga ma su’esu’ega a auaunaga nei e lua i se matāupu tau nakoti.
O se matāupu e faamauina e iai sootaga i gaioiga faasolitulafono tuufaatasi a se vaega o se faalapotopotoga (syndicate), o le aumai faananā ai o nakoti i totonu o Aotearoa e tauala mai i le malaevaalele i Aukilani.
Ua faamauina i se pepa o faamatalaga a le Matāgaluega o Leoleo, NZ Police, na faamanino mai ai le manuia o se tasi galuega tele ua ta’ua o le Operation Matata i le mae’a ai ona faatino o ni pepa faataga poo search warrants e pei ona faia ai ni osofa’iga i le tele o itu o Aukilani.
Mai su’esu’ega ma sa’iliga a leoleo, na faamaonia mai ai le oo atu i le 18 tagata na saisai ma taofia e malu o le malo; e aofia ai le to’a 9 o tagata e galulue i le vaega ua ta’ua o baggage handlers ma le to’atasi e faigaluega foi i le malaevaalele.
O le to’a sefulu ma le fitu o i latou ua taofia ma molia nei o alii e i le va o le 20 ma le 42 tausaga le matutua, ma se tama’ita’i talavou e 19 tausaga le matua.
Na tutula’i nisi o i latou i luma o le Faamasinoga Faaitumalo i Manukau i le aso ananafi, ae o isi o le a tutula’i i le asō.
I taunuuga o lea galuega, na maua ma taofia e leoleo ma le ofisa o tiute, le 24 kilokalama o le pauta faasāina o le methamphetamine ma le 3.4 kilokalama o le pauta faasāina o le cocaine.
Na maua ma taofia foi e auaunaga nei e lua ni seleni e masalomia o ni tupe e maua mai i le faatauina atu o fualaau faasāina, ma se ‘au’upega mata’utia poo se fana i lona ituaiga o le shot-gun.
Puna o Faamatalaga: https://www.police.govt.nz/news/release/police-and-customs-bag-smuggling-ring-operating-airside
