O le Aso Gafua o le vaiaso a sau ua faatulaga e amata valaau ai molimau a leoleo e lagolago ai moliaga o loo tuua’ia ai le susuga Laauli Leuatea Poalataivao Fosi Schmidt, ma le afioga Fepuleai Su’a Faimata o Faipule o le Palemene, faapea Li’o Faataumalama sa galue o se leoleo sinia, o Lise Marie Schmidt, ma le ulugalii o Samuelu poo Sam Fauena Simiko Su’a ma Sivai Fauena.

Ua mana’omia ai e le faamasinoga tusitala o auaunaga faasalalau i le atunuu e tuuina atu le suafa o le tusitala e to’atasi o le a auai e lipoti taualumaga o lea faamasinoga.

E iai le talitonuga o le vaapiapi o le potu faamasinoga i le Faamasinoga Faaitumalo o le mafua’aga lea o le to’atasi o le tusitala e auai, auā e to’atele foi le autapua’i a i latou o loo molia e fia auai. 

O loia mai fafo o loo finauina tali tetee a i latou uma e to’aono o loo molia i tuua’iga o le taupulepule e faatino se soligatulafono ma le taumafai e natia le faia o le amiotonu.

O moliaga nei e mafua mai i le su’esu’ega na faia i le maliu o se alii talavou o Tuuau Faasavalu e aunoa ma se faatagaga mai le Komesina o leoleo.