Ua tuuina mai nei ripoti a le leitio faavaomalo a Niu Sila, e tusa ai ma faamatalaga o le foufou mai ai o timuga mamafa e ono vaaia mo faaitu o Tasman i le aoauli, ma ua fautuaina e le sui pulenuu lona aai, o le a fetaia’i i latou ma uiga loulouā o le tau, ma e tatau lava ona mata’ituina lelei. O lona iloa e lē toe foi i se tulaga lelei uiga o le tau mo le latou faaitu, o le ala lea e tatau ai ona tapenapena.
Mo le silafia, o lea faato’a tau maui atu nisi o lologa ma tafega na alia’e mai talu ai nei e pei ona molimauina ai le faaleagaina o le tele o laufanua ma vaega o aai o itu nei. E pei ona faamauina le matua’i aafia o maota ma laoa aemaise o fanua o tagata fai lafumanu ma isi. E tusa ai ma faamaumauga ma ripoti, e 15 fale o aiga na faaleagaina, ma o loo faaalia le faapipii ai o pepa samasama i tulaga o saogalemu, o lona uiga e iai vaega o le fale e lē o mafai ona agai ai.
Ma o lē tasi o fale ua māua le faapipii iai o le pepa mumū o lona uiga ua matua’i tapu lava, pe ua faasā ona ulufale atu iai se isi i lea fale ona o tulaga pagatia, a o le lē saogalemu talu ai lologa malolosi na aafia ai. Faamauina o nei maota ma laoa o loo i Motueka Valle, Tapawera ma Wai-iti.
Ua fautuaina e le Ofisa o le Vaaitau, le amata aafia ai o vaega o le itumalo o Tasman i matū i sisifo o Motueka amata mai i le aoauli nei seia paia le itula e 3 i le vaveao o le Aso Tofi.
Māua le tuu atu o le tau’au fesoasoani o le toatele o fanau aoga o le vaega ‘au o le atunuu poo Student army ma le tele o faalapotopotoga e tapena ma faatino fuafuaga e tali atu i aafiaga e ono tulai mai i le loulouā o le tau, aemaise o lologa tetele. E aofia ai le fesoasoani atu e toe tapena ma kilia otaota ma lapisi i ia faaitu.
Puna o Faamatalaga: https://www.rnz.co.nz/news/national/566347/tasman-heavy-rain-forecast-hope-for-the-best-but-prepare-for-the-worst-deputy-mayor-says
