O ālafua poo conventions e faatonu folau ma lima ta’ita’iina ai se malo tausi a o lumana’i se palota tele e sa’ilia ai sui o se palemene ma iloa ai se faigamalo fou, ua faailoa e le Minisita o Tupe i se faatalanoaga talu ai nei, o le faasinoala lea mo isi malo tausi i le lumana’i.
Sa faailoa ai e le minisita o le tuuina atu e le Loia Sili o ia ālafua ua silafia ai ma malamalama le Kapeneta a le malo tausi, o le Fofoga Fetalai e maua lona totogi ae toe faafoi le taavale, o le Sui Fofoga Fetalai e lē maua se totogi ma toe faafoi le taavale.
Peita’i ua faailoa e le failautusi o le fono aoao faitulafono i se pepa o faamatalaga e sili atu ona malosi aiaiga o le Tulafono o Pule ma Tulaga Aloa’ia a le Fono Aoao Faitulafono o le tausaga e 1960 na pasia e le Palemene, o loo aiaia ai le faaauau o tofiga o le Fofoga Fetalai ma le sui Fofoga Fetalai i le taimi o le malo tausi.
O lea foi aiaiga o loo aiaia ai ma le faaauau o faamanuiaga mo ia tofiga e pei o totogi ma taavale a le malo.
O aiaiga o lea tulafono ua faaalia e le failautusi o le fono aoao e sili atu nai lo le tulafono faatonutonu ma le maliega ua lipotia ai se finagalo o le malo tausi.
Sa faailoa e le minisita o tupe le afioga Lautimuia Afoa Uelese Vaai i le feiloa’iga ma tusitala na faailoa ai le pasene o le meaalofa a le NPF mo lana ‘au faisaofaga, ua tuuina atu le tusi i le Fofoga Fetalai ma le Sui Fofoga Fetalai ua faailoa ai conventions ua tuuina atu e le Loia Sili e faasino i lenei matāupu.
O lea tusi ua faailoa lautele e le Fofoga Fetalai o loo sainia ai le Ofisa Sili o le matāgaluega o tupe a le Malo.
Ua tali iai le Fofoga Fetalai le susuga Papalii Li’o Oloipola Ta’eu Masipa’u ma faailoa i le Ofisa Sili o tupe e solitulafono le gaioiga ua ia faia o le tusi tauanau e faafoi atu taavale o loo la faaaogāina ma le Sui Fofoga Fetalai.
Ua fautuaina e Papalii le Ofisa Sili o tupe e sa’ili se fautuaga faaletulafono mo ia, ina ia malamalama atili ai i aiaiga o le Tulafono o Pule ma Tulaga Aloa’ia o loo aiaia ai tofiga o le Fofoga Fetalai ma le Sui Fofoga Fetalai e aofia i le malo tausi pe a faatā’ape le Palemene.
