O le afioga i le Kovana Sili o Amerika Samoa ma lona faletua faapea lana aumalaga o sui o le faigāmalo i Sasa’e, o malo faaaloalogia lea i le sauniga o le faatautoina o sui usufono filifilia uma o itumalo faapalota e 51 o le atunuu mo le paea’iga 18 a le Palemene o Samoa.
O le Aso Lua lenei i Samoa ua faatino ai lea sauniga e pei ona auai le Kovana Sili le afioga Pulaalii Nikolao Pula ma lona faletua ma nisi o ofisa sinia o le faigāmalo a Tutuila ma Manu’a.
O le afioga i le Ao o le Malo, afioga Tuimalealiifano Vaaleto’a Sualauvi II na malele e tatala aloa’ia le ulua’i tauaofiaga a le paea’iga 18 a le Palemene, lea o le a lē gata ina faatauto uma ai sui usufono filifilia o itumalo na manumālō mai le faigāpalota tele ua mae’a, ae na faatauto ai ma tofiga o le Fofoga Fetalai ma le Sui Fofoga Fetalai.
O ia tofiga uma ua filifilia mai sui faipule ua lagolagoina le vaega faaupufai o le Faatuatua i le Atua Samoa ua tasi na manumālō i le palota tele i le aofa’iga e 31 nofoa.
O le tasi o sauniga o le a faatino i lea sauniga o le faatautoina o le Palemia filifilia le susuga Laaulialemalietoa Leuatea Polataivao Fosi Schmidt, ma Minisita o lana Kapeneta ua ia filifilia.
O le lua a’i lea o paea’iga faapalemene ua faaaogā ai teuteuga o le faavae sa pasia e le Palemene i se paea’iga ua mavae lea ua 15 ai Minisita o le Kapeneta e aofia ai le Palemia.
O le paea’iga 17 a le Palemene i le ulua’i faigāmalo a le Faatuatua i le Atua Samoa ua Tasi na faaaogā ai lea teuteuga ua siitia ai le numela o Minisita o le Kapeneta mai le 13 i le 15.
O le tala autū o le tupe mo galuega a le malo o le tasi lea o galuega muamua a le faigāmalo fou, aua e pei ona silafia o le teena o le tala autū o le tupe a le faigāmalo tausi ua mae’a nei lo latou taimi, sa faaaoga ai nao le 25 pasene o le tala autū o le tupe o le tausaga 2024 i le 2025.
