O le faauluuluga a Malo Aufaatasi i le vaega o loo feagai ma le mata’itūina o mataupu tau niukilia, ua ia ta’ua o osofa’iga a Amerika ia Iran sa toeitiiti lava matua’i faaleagaina uma ai le polokalame niukilia lea ma e ono toe amata i ni nai masina le maua o le uranium a lea atunuu.
O lona uiga ua ese mai lea faamatalaga mai le faamatalaga a Trump sa faia e autausagā faato’ā toe mafai ona tupu lea tulaga i Iran ona o osofa’iga a Amerika.
O le finagalo faaalia lea o Rafael Grossi le sui lea o Malo Aufaatasi ua faailoa i le CNN ma ua foliga ua lagolago ai le ulua’i iloiloga sa faia e le Pentagon i le matāupu lea ma aafiaga o osofa’iga na faatino a Amerika i nofoaga niukilia o Iran.
E ui la o loo talia pea le iloiloga faai’u o le su’esu’ega lea peita’i o loo maumaua’i pea Trump o le osofa’iga na faia ua matua’i soloia ma faaleagaina uma ai le polokalame niukilia lea a Iran.
Faailoa la e Grossi e moni e tele le aafiaga ua iai nei i nofoaga ia o Iran ae o loo iai lava le mafai ia Iran e ala i ana fale gaosi oloa ma faiga faatekonolosi e toe amata faaauau ai le gaosia o le uranium.
Fai mai ua mae’a ona pasia i le Palemene a Iran se pili e taofia ai le galulue faatasi ma le vaega lea o Malo Aufaatasi ae ua saunoa foi le minisita o le va i fafo a le atunuu o loo toe tomānatu nei foi le atunuu e faatatau i le avea ai ma sui o le NPT poo le Non Proliferation Treaty lea e faasā ai atunuu o loo avea ma sui o le faalapotopotoga ona faalautele ni polokalame o auupega faaniukilia.
Puna o Faamatalaga: https://edition.cnn.com/2025/06/29/world/iaea-iran-enriched-uranium-intl
