O Faleata 1 o se itumalo pito to’atele ona tagata palota e 7,701 ma o se isi lea o itumalo faapalota e silia i le 300 palota faapitoa ae silia foi i le 300 palota muamua sa faatalitali iai se suiga i le faai’uga o lana faigā filifiliga ina ua amata le faitauga aloa’ia o le faigāpalota tele a le atunuu.

O ananafi le Aso Lua i Samoa na manino ai le faavasegaina o palota a Faleata 1 ma ua suia ai le faai’uga lē tumau i le po o le Aso Faraile ua mavae lea sa palota silia le sui tauva o le Faatuatua i le Atua Samoa ua Tasi le tofa Manuleleua Paletasala Tovale o ia foi sa tula’i i le tofi faipule o le itumalo.

Peita’i ua suia lea faai’uga i le faitauga aloa’ia ma ua manumālō nei le sui sa tauva i le vaega faaupufai e puipuia aiā tatau a tagata le afioga Faumuina Opapo Soana’i Oeti i le aofa’iga e 1,466.

Ua tulaga lua le isi sui tauva o le vaega e puipuia aiā tatau a tagata le tofa Manuleleua Sonny Lameta e 1,427 palota na ia maua ae tulaga tolu ai lē sa umia le nofoa le tofa Manuleleua Paletasala Tovale e 1,423 palota na ia maua.

O le sui sa tauva tuto’atasi le tofa Toma’agaune Mikaele Une e 406 palota ua ia maua.

O le tusi aao o lea itumalo e tula’i mai le afioga Faumuina le Tupufia e tauave le tofi faipule o Faleata 1, ua toe pale ai le afio’aga o Lepea i le tofi o le itumalo sa seei ai le sui o le afio’aga o Vaimoso i le paeaiga 17 a le Palemene.

O nisi o itumalo palota ua aloa’ia a latou faai’uga i le aso lona lua o le faitauga aloa’ia, o Alataua i Sisifo ua faamautū le manumālō o le sui tauva o le Faatuatua i le Atua Samoa ua Tasi le susuga Taituave Lafaitele Valoaga Taaititi Iona e 622 palota ua manumālō ai, ae o le sui tauva tama’ita’i o le vaega faaupufai e puipuia aiā tatau a tagata le afioga Aliimalemanu Moti Alofa Tuuau na ia maua palota e 477.

I Palauli 2 o le faitauga aloa’ia ua mautū ai le sui filifilia o lea itumalo sa vāvālalata palota a lē na tulaga muamua ma le tulaga lua i le mae’a o le faitauga e le’i aloa’ia i le Aso Faraile ua mavae.

O le tofa Fiu Faaolatane Ponifasio Vasa o le sui tauva tuto’atasi ae e lagolago i le Faatuatua i le Atua Samoa ua Tasi ua manumālō i le aofa’iga e 632, pito iai palota e 631 ua maua e le isi sui sa tauva tuto’atasi ae lagolago foi i le Faatuatua i le Atua Samoa ua Tasi le afioga Faaolatane Fiu Tuala Iona Pa’ō e 631 ana palota, ma e tasi le palota ua manumālō ai le isi sui tauva tuto’atasi o le Faatuatua i le Atua Samoa ua Tasi.

O le afioga Leota Laki Lamositele Sio sa seei i le nofoa ma tauva i le fu’a a le Faatuatua i le Atua Samoa ua Tasi ua tulaga tolu i palota na ia maua e 251.

Ua pito iai palota e 156 na maua e le isi o sui tauva tuto’atasi mai lea lava itumalo le tofa Tiatia Faleupolu Tevita, o le sui sa tauva i le fu’a a le vaega e puipuia aiā tatau a tagata o Faasuai’au Naifoua Sālū Asiata Selesele Tanielu e 55 ana palota na maua, ma le sui tauva o le Samoa ua Potopoto o Tusiata Tiatia Fiu Hay Dempsey Kalapu e 15 palota na ia maua.

I Gagaemauga 2 i le faitauga aloa’ia ua toe manumālō mai ai lē sa seei i le nofoa o se sui tauva o le Faatuatua i le Atua Samoa ua Tasi, le tofa Seuamuli Letuuga Fasi Toma e 606 palota na ia maua, pito iai le sui tauva tuto’atasi o se tamalii sa seei foi i le nofoa o lea itumalo i se isi paeaiga le afioga Valu Matai’a Nafoitoa Talaimanu Keti sa ia maua palota e 310, ae taualuga i le 204 palota na maua e le sui tauva tama’ita’i mo le vaega faaupufai e puipuia aiā tatau a tagata le afioga Galuvao Matai’a Valma Galuvao.

O le itumalo o Siumu ua faamautū le manumālō o le sui tauva tuto’atasi le afioga Faalogo Asuao Kapeliele II Faalogo i le 492 palota ua ia maua, tulaga lua palota e 456 ua maua e lē sa seei i le nofoa o lea itumalo le tofa Tuu’u Anasii Leota sa tauva i le fu’a a le Faatuatua i le Atua Samoa ua Tasi.

O lē sa tauva i le fu’a a le vaega faaupufai e puipuia aiā tatau a tagata le tofa Faiva Laulauofolasa Lokeuaina Luamanuvae ua tulaga tolu i palota na ia maua e 335, o Tuu’u Ekiumeni Fauolo sa tauva mo le Samoa ua Potopoto na ia maua palota e 39 ma le sui tauva tuto’atasi le afioga Tofaeono Meaalofa Salamasina Tofaeono na ia maua palota e 19.

Ua faamautū i le faitauga aloa’ia o palota a le itumalo o Vaisigano 1 le manumālō o le sui tauva o le Faatuatua i le Atua Samoa ua Tasi le afioga Amituanai Malolo Tautofi Roma ua ia maua palota e 570, pito iai palota e 420 ua maua e le sui sa tauva tuto’atasi o Masoe Vaai Matemini Seiuli Taulafo e 420 palota, ae tulaga tolu le sui tauva o le Samoa ua Potopoto sa seei i le nofoa o Vaisigano 1 i le paeaiga 17 a le Palemene ae o se tasi o minisita o le malo tausi le tofa Niuava Eti Malolo ua ia maua palota e 158.

I Aana Alofi 4 ua manumālō ai le sui tauva tama’ita’i mo le vaega faaupufai o le Faatuatua i le Atua Samoa ua Tasi le afioga Afamasaga Leone Mati Vaili Masame ua ia maua palota e 848, tulaga lua palota ua maua e le sui sa tauva mo le pati a le vaega e puipuia aiā tatau a tagata o Sevealii Taulalo Sevealii na ia maua palota e 602, tulaga tolu palota e 454 na maua e le sui sa tauva i le fu’a a le Samoa ua Potopoto sa seei i le nofoa le afioga Toeolesulusulu Posē Salesa Cedric Schuster e 454 palota ua ia maua, tulaga fā palota ua maua e le sui tauva tuto’atasi o Tagoiaega Maotua Levi Puipui e 434 ana palota ma le tasi o sui tauva tuto’atasi o Lasei Sione Lasei e 65 palota sa ia maua. 

I le itumalo o Gagaifomauga 2 lea e to’aono sui tauva sa tausinio mai ai, ua faamautū le toe filifilia o le tofa Foisala Lilo Tuu Ioane sa tauva i le fu’a a le Faatuatua i le Atua Samoa ua Tasi ua na maua le aofa’iga o palota e 334, tulaga lua palota e 310 na maua e le sui tauva tuto’atasi le afioga Falesaopule Seimaleula Vaialia Iosua, tulaga tolu ai palota ua maua e le sui tauva mo le vaega e puipuia aiā tatau a tagata le afioga Tologataua Sooalo Sioeli Alofaifo Lamese e 303 palota ua ia maua, pito iai le aofa’iga o palota e 222 na maua e le sui tauva o le vaega faaupufai o le Samoa Labour le afioga Sooalo Feo Umi Mene Siaosi, o le sui tauva o le Samoa ua Potopoto le afioga Sooalo Maua’i Kuresa Sooalo na ia maua palota e 171, ma le sui tauva tuto’atasi o Tagaloa Mark Huch na ia maua palota e 120.

I le faitauga aloa’ia a le itumalo palota o Sagaga 4 ua faamautū le manumālō o le sui sa tauva mo le vaega faaupufai e puipuia aiā tatau a tagata le tofa Lefue Pelenise Lelevaga e 1,048 palota ua ia maua.

O le sui tauva tuto’atasi sa seei i le nofoa o lea itumalo i ni paeaiga ua tuana’i le afioga Patea Tuisā Tulimasealii Tasi ua tulaga lua i le filifiliga a lea itumalo na ia maua palota e 540, tulaga tolu ai palota na maua e le sui tauva o le Faatuatua i le Atua Samoa ua Tasi sa seei i le nofoa o le itumalo le afioga Tagaloatele Pasi Poloa e 476 palota na ia maua, o le sui tauva o le Samoa ua Potopoto le afioga Mataafa Saeni Leatupu’e na ia maua palota e 434, ma le sui tauva tuto’atasi o Tumua Kelemete Sapa’u Vitale na ia maua palota e 4.

O lea foi ua faailoa le faitauga aloa’ia o palota mo le itumalo o Gagaifomauga 1 ma ua faamautū le manumālō ai o le ta’ita’i o le vaega faaupufai o le Faatuatua i le Atua Samoa ua Tasi le susuga Laaulialemalietoa Leuatea Polataivao Fosi Schmidt i le aofa’iga e 869 palota, ae o le sui tauva tama’ita’i mo le vaega faaupufai e puipuia aiā tatau a tagata le afioga Faaulusau Faatoatoa Rosa Duffy Stowers na ia maua palota e 98.

O faitauga aloa’ia uma nei sa tuu faatasia ma faailoa e le komisi o faigāpalota i le aso ananafi ma le po anapo.

O loo faagasolo pea lea faitauga aloa’ia e pei ona fuafua e tatau ona oo atu i le Aso Faraile ua mae’a.