Na sesē ona sulu e foma’i le tube poo le faagā’au sa tatau ona sulu i le vaega e fesoasoani i le mānava a le tinā a o faia sona ta’otoga, peita’i na sulu sesē i le vaega e fafaga iai mea’ai i lenei tinā.
E tusa ai ma le lipoti a le RNZ, e 17 minute o iai lea faaga’au i le itu sesē a o faia le ta’otoga o lenei tinā i le falema’i i Aukilani ma na avea ma itu na matuā afaina ai lenei tinā ina ua faamanu’alia lona fai’ai se’i tulou i se tulaga e le’i mafai ai ona toe faasaoina mai ai lona soifua.
E 73 tausaga o le soifua o lenei tinā ua ma’umau ai lona soifua mai le faatamala o galuega a foma’i, ma o le tausaga e 2021 na tula’i mai ai lenei faalavelave, ae o lea faato’ā faalauiloa mai i tua le i’uga o su’esu’ega na faia.
Ua lipotia le faitioina e le Health and Disability Commissioner, o le foma’i sa ta’ita’ia le vaega e faia vaifaagase e tapena ai gasegase mo ta’otoga ona o le faatamala.
Ta’ua e le sui komesina mai le HDC, o Carolyn Cooper, e iai lava taimi e sesē ai le itu e sulu i ai le faaga’au, ae masani lava ona vave ona toe faaleleia ma faasaoina ai se soifua, ae o le tulaga na tula’i mai, sa tuai ona iloa e foma’i se faaletonu, ma na faato’ā iloa ina ua pa’ū maulalo le tele o le okesene i le tino o le tinā ma telegese le tātā o lona fatu a o faia le ta’otoga.
Na taumafai foma’i e fai le CPR ae ua siliga se lavea’i aemaise sa iai ma nisi lavelave tugā i le soifua o si tinā ua faigatā ai ona toe faasaoina lona soifua.
Ta’ua e le matāgaluega o le soifua mālōlōina a Niu Sila, talu mai lenei faalavelave na tupu, ua tele nisi suiga ua faia aemaise lava ina ia toe a’oa’oina lelei le aufaigaluega i vaega uma nei e mataala iai i taimi o ta’otoga.
Puna o Faamatalaga: https://www.rnz.co.nz/news/national/571692/auckland-woman-dies-after-breathing-tube-mistakenly-inserted-into-food-pipe
