Ua lipotia mai le maliu ai o se tinā ina ua lavea faafuase’i lana taavale ina ua taia i se vaa ma se trailer a se tasi o taavale na mamulu ese a o iai i luga o le alatele.
Ta’ua sa iai ma si ana tama tama e 3 tausaga le matua sa nofo i le pito i tua o le taavale i le taimi na lavea ai le la taavale.
Faamauina i lipoti mai le RNZ, e faapea e taunuu atu le vaega o faalavelave faafuase’i o fesoasoani muamua, o loo ola le tamaitiiti, ma i le mae’a o siaki e manu’a mitimiti.
Ae o le tulaga faamomoiloto, o le fai atu o sia alualutoto i le vaega o fesoasoani muamua, ua maliu lona tinā, ma fai atu e vaai lana telefoni o loo i le isi itu e valaau ai lo latou aiga.
O lenei matāupu na ta’ua na tula’i mai i le masina talu ai, ma o lea ua valaau le aiga o lē ua maliu, le tama’ita’i o Nateisha-Kurstyn Pareteoro Hana-Wetere, mo le avetaavale e ana le vaa ma le trailer ina ia aga’i atu.
Faamatala e le tuagane o Nateisha i le leitio faavaomalo a Niu Sila, o lea na aga’i atu le taavale a si ona tuafafine, mai Tekuiti mo Aukilani, sa toe foi atu mai se la tafaoga mai New Plymouth i le aso 11 o Iulai ae tula’i mai loa le faalavelave.
Faaalia e le tuagane o lē ua maliu, ia Brown-Hana lona faanoanoa tele, ona o lea lava e le’i maua pe oo ane le tagata e ana le taavale na mamulu ese mai ai le vaa ma le trailer ma lavea ai si ona tuafafine.
Ua ta’ua e le saitini o loo nafa ma lenei matāupu, o le leoleo su’esu’e faapitoa, Detective Sergeant Harry Hodgson, i le taimi nei o loo moomia e leoleo soo tasi na molimauina lea faalavelave, ina ia faafesoota’i atu le ofisa.
Ua talosagaina foi se tasi na molimau pe na vaai i le taavale i le ituaiga o le SUV lanu uliuli o loo aga’i atu i itu Saute, na iai le vaa a o le’i aafia i le faalavelave.
Puna o Faamatalaga: https://www.rnz.co.nz/news/national/569670/mother-died-in-crash-after-boat-and-trailer-unit-from-oncoming-car-broke-free=
