O se tala faanoanoa mo si aiga mai North Shore ina ua maliu faafuase’i le tinā o le aiga, a o moe i le taeao o le Aso Gafua na te’a nei.
E na o le 40 tausaga o le tinā ia Rupal Sharma, ma i le lipoti a le Newstalkzb o loo ta’ua ai, e faato’ā 6 masina talu ona malaga mai Shama i Niu Sila e nonofo ai ma lona to’alua o Umakant Sharma, ma si a la fanau e to’alua, o le teineitiiti ua 10 tausaga lona matua, ma le tamaitiiti ua 7 tausaga le matua.
O lenei aiga e mai le atunuu o Initia, ma sa iai moemitiga o lenei tinā talavou e fia galue o se faia’oga mo le matāupu o le faasaienisi.
Fai mai le lipoti, sa momoe faatasi uma lenei aiga i totonu o se potu i le po na maliu ai le tinā.
O si ana tama teine sa taumafai e fafagu lona tinā, peitai na ia matauina ai e lē o mānava.
Sa taumafai le tamā e faaola lona to’alua ma faia iai le fesoasoani muamua, ae e le’i manuia uma na taumafaiga se’ia oo ina ua alu atu le ambulance e ave ai i le falema’i, peitai e 10 minute talu ona taunuu i le falema’i ae uma loa lona soifua.
O Novema o le tausaga talu ai na malaga mai ai le tamaloa i Niu Sila, ae mulimuli mai lona toalua ma si a la fanau i le 6 masina talu ai, ma faamautū ai lenei aiga i North Shore.
O lea e iai le mana’oga o si tamā ia Umakant Sharma e toe fia molimoli le tino maliu o si ona to’alua i Initia ina ia toe faatasi ma nai o la aiga i ona taimi mulimuli, ma o loo faia ai nei sina sa’iliga tupe i luga o le initaneti le Givealittle mo se seleni e mafai ai ona latou malaga ma si ana fanau e toe momoli si ona to’alua i ona aiga o loo tagi mai ala.
Puna o Faamatalaga: https://www.newstalkzb.co.nz/news/national/auckland-mother-dies-suddenly-family-plan-to-return-to-india-for-farewell/
